KQZ me mbledhjen e radhës, propozohet hapja e kutive postare për votimin jashtë vendit

Komisioni Qendror i Zgjedhjeve pritet të mbaj mbledhjen e 61’të, për të vazhduar me përgatitjet për organizimin e zgjedhjeve të 9 shkurtit 2025, për Kuvendin e Kosovës.

Në mesin e shumë pikave të rendit të ditës që lidhen kryesisht me përgatitjet për organizimin e këtyre zgjedhjeve është edhe “propozimi për hapjen e kutive postare jashtë Kosovës”.

Sipas KQZ-së, pikat tjera të rendit të ditës janë edhe shqyrtimi dhe miratimi i nominimeve për emërimin e dy anëtarëve të KKZ në komunën e Parteshit për Kuvendin e Republikës së Kosovës 9 shkurt 2025.

Pastaj, shqyrtimi dhe miratimi i zëvendësimit dhe emërimit i anëtarit të KKZ në komunën e Lipjanit për Zgjedhjet për Kuvendin e Republikës së Kosovës 9 shkurt 2025, shqyrtimi dhe miratimi i specifikave teknike për Doracak të trajnimit për Zgjedhjet e Rregullta për Kuvendin e Republikës se Kosovës 9 shkurt 2025 dhe për zgjedhjet lokale 2025, shqyrtimi dhe miratimi i specifikave teknike për shtypjen e distinktivëve për procesin e votimit për zgjedhjet për Kuvendin e Kosovës 2025 dhe për zgjedhjet lokale 2025.

Njoftimi i plotë: 

Njoftim nga mbledhja e 61-të e KQZ-së: Hapja e kutive postare jashtë Kosovës Prishtinë, 14 nëntor 2024 – Komisioni Qendror i Zgjedhjeve mbajti mbledhjen e 61-të në vitin 2024, të kryesuar nga kryesuesi i KQZ-së, Kreshnik Radoniqi.

Në këtë mbledhje, KQZ miratoi propozimin për hapjen e kutive postare për procesin e votimit jashtë Kosovës. Me qëllim të ofrimit të mundësisë për votim për shtetasit që regjistrohen suksesshëm dhe që zgjedhin mënyrën e votimit duke dërguar fletëvotimin në kutinë postare jashtë Kosovës, KQZ do të kërkojë nga Ministria e Punëve të Jashtme dhe e Diasporës hapjen e nga një kutie postare në këto shtete: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kroaci, Mal i Zi, Maqedonia e Veriut, Norvegji, SHBA, Shqipëri, Slloveni, Suedi, Turqi, Mbretëria e Bashkuar dhe Zvicër.

Sipas Ligjit nr. 08/L-288 për Zgjedhjet e Përgjithshme, gjatë periudhës së aplikimit për t’u regjistruar si votues jashtë Kosovës, votuesit mund të votojnë duke u përcaktuar individualisht për mëyrën e votimit:

1. Të votojë fizikisht në njërën nga përfaqësitë diplomatike të Republikës së Kosovës;
2. duke dërguar fletëvotimin përmes postës në kutinë postare të KQZ në Kosovë;
3. duke dërguar fletëvotimin përmes postës në një nga kutitë postare të hapura nga KQZ jashtë Kosovës. Andaj, vendimi i mbledhjes së KQZ-së është i lidhur drejtpërdrejtë me mënyrën e votimit sipas pikës 3, për të cilën janë përcaktuar shtetasit jashtë Kosovës, në momentin e regjistrimit: Duke dërguar fletëvotimin përmes postës në një nga kutitë postare të hapura nga KQZ jashtë Kosovës. Në vazhdim të mbledhjes, KQZ mori edhe disa vendime në kuadër të përgatitjeve për organizimin e Zgjedhjeve për Kuvendin e Kosovës, të cilat do të mbahen më 9 shkurt 2025, siç janë: • Vendim për miratimin e nominimeve për emrimin e dy anëtarëve në Komisionin Komunal të Zgjedhjeve në komunën e Parteshit; • Vendim për miratimin e zëvendësimit dhe emërimit të anëtarit në Komisionin Komunal të Zgjedhjeve në komunën e Lipjanit; • Vendim për miratimin e specifikave teknike për doracak të trajnimit për Zgjedhjet për Kuvedin e Kosovës, 9 shkurt 2025 dhe për Zgjedhjet Lokale 2025; • Vendim për miratimin e specifikave teknike për shtypjen e distinktivëve për Zgjedhjet për Kuvendin,9 shkurt 2025 dhe për Zgjedhjet Lokale 2025.