Komuna e Vitisë u bashkohet komunave që ua bënë bllok doracakëve të “Edukimit Seksual”
Pas Prishtinës dhe disa komunave tjera, edhe ajo e Vitisë do të ndalojë përdorimin e Doracakëve “Edukimi Seksual dhe Shëndeti Riprodhues” për nivelet 1-5, 6-9 dhe 10-12 në shkollat e kësaj komune.
Kryetari i komunës, Sokol Haliti tha se vendimi do të merret nesër, ndërsa shtoi se “ky vendim do të merret pasi kemi shqyrtuar përmbajtjen e këtyre udhëzimeve dhe shqetësimet e ngritura nga përfaqësuesit e Komunës dhe nga prindërit, lidhur me përshtatshmërinë e aktiviteteve dhe materialeve të propozuara”.
“Ne besojmë se përmbajtja e këtyre doracakëve nuk është e përshtatshme për fëmijët dhe nxënësit tanë dhe mund të ndikojë negativisht në zhvillimin e tyre të shëndetshëm”.
“Kjo është një masë që do të ndërmerret me qëllim mbrojtjen e interesave dhe mirëqenies së nxënësve tanë, si dhe për të siguruar që edukimi të jetë në përputhje me vlerat dhe normat tona”, u shpreh Haliti.
