Në një letër të drejtuar trajnerit të Tre Luanëve, mbreti shkroi se “ishte një arritje e madhe” që arritën në finale dhe ekipi duhet të përqendrohet “te triumfet e shumta që padyshim do të vijnë”.

Ndërsa Princi i Uellsit, William i cili e ndoqi finalen në Berlin së bashku me të birin, princin George shkroi në platformën X:

“Këtë herë thjesht s’ishte e thënë. Ne gjithsesi jemi shumë krenarë për ju. Përpara Angli.”

Babë e bir u shoqëruan dhe nga kryeministri Sir Keir Starmer dhe Ministrja e Kulturës, Lisa Nandy. Familjes mbretërore britanike iu bashkua dhe Felipe VI, Mbreti i Spanjës dhe vajza e tij, princeshë Sofia.

Nuk munguan as të famshmit britanikë në tribunë si Ed Sheeran, Harry Styles, Piers Morgan, Olly Murs dhe Louis Tomlinson. Nga bota e futbollit ishin të pranishëm Peter Crouch, Arsène Wenger dhe Gareth Bale. Ata që nuk mundën të gjendeshin aty për të ndjekur nga afër duelin final, ndanë mesazhe e postime përmes rrjeteve sociale në mbështetje të ekipit anglez.