Kajtazi: Ekziston strukturë paralele në AKI, përmend emra

Gazetari Vehbi Kajtazi ka thënë se brenda AKI-së ka një strukturë paralele me zyrtarë të Vetëvendosjes që po përndjek gazetarët kritikë të pushtetit.

Ai ka thënë se kjo strukturë paralele i shërben pushtetit.

“Ka struktura paralele, siç janë në institucione të tjera që i shërbejnë pushtetit, i shërbejnë Dejona Mihalit dhe strukturave të tjera të Vetëvendosjes. Kujtim Shala, inspektor, është i afërt me Vetëvendosjen, ish-zyrtar jo me najfar të kalume të lavdishme, i cili ka qenë nën masa disiplinore për shkak të shkeljeve që ka bërë në FSK, ka qenë anëtar i bordit të Postës dhe së fundmi është emëruar kryeinspektor”, ka thënë Kajtazi.

“E di se ky është në krye sepse merrem me këtë punë para Shalës, në kuptimin e hulumtimit dhe që i njoh njerëzit në AKI, prokurori, polici. Të ndershëm. Kjo strukturë i ka vënë në shënjestër gazetarët kritikë. Kjo strukturë është me njerëz të Vetëvendosjes. Lufta në raport me gazetarët ka nisur shumë moti”, ka thënë ai në Rubikon të Klan Kosovës.