Ja pse dështoi transferimi i Sensit te Leicester City

Transferimi i Stefano Sensit nga Interi tek Leicester City dështoi në minutat e fundit të afatit kalimtar të janarit.

Sensi kishte udhëtuar për në Angli në orët e fundit të së enjtes, duke menduar se do të përfundonte një transferim të përhershëm te Leicester City, duke iu bashkuar bashkatdhetarit të tij Enzo Maresca.

Sensi nuk ishte stërvitur me shokët e tij të Interit përpara udhëtimit të tij në Angli, por transferimi i tij në stadiumin “King Poëer” nuk u konkretizua, përcjellë KosovaPress.

Sipas një raporti nga “Gazzetta dello Sport”, i gjithë faji është te Leicester Cityt pasi skuadra angleze u përpoq të ndryshonte kushtet e marrëveshjes disa herë gjatë afatit kalimtar të janarit dhe kryesisht në ditën e fundit të afatit.

Raportohet se Leicester City fillimisht kishte ofruar 500,000 euro plus 2 milion euro bonus nëse do të kishte arritur promovimin në Premier Ligë këtë sezon. Interi e pranoi ofertën, por klubi anglez nuk i dërgoi kurrë një pjesë të dokumenteve të nënshkruara.

Interi ra dakord të dërgonte Sensin në një transferim falas në ditën e fundit, por marrëveshja do të vinte me 2.5 milionë euro shtesë, në varësi të promovimit të Leicester Cityt në Premier Ligë.

“Drejtorët e Interit, Marotta, Ausilio dhe Baccin e bënë këtë për të ndihmuar klubin anglez që po merret me kontrolle të rrepta financiare nga liga”, shkroi gazetari Andrea Ramoazzotti.

Sipas raportit, çështjet e FFP-së dhe leja e punës kontribuan në transferimin e dështuar të Sensi-t, por në fund jo të gjithë në Leicester City ishin të bindur për nënshkrimin e Sensit, ndryshe nga trajneri i tyre Maresca, i cili kishte shtyrë të ribashkohej me bashkatdhetarin e tij.