Haradinaj premton zhvillimin e turizmit malor në Kosovë

Ramush Haradinaj, kandidat për kryeministër i koalicionit AAK-Nisma-Konservatorët-E30, ka shprehur angazhimin e tij për të transformuar bjeshkët e Kosovës në një destinacion evropian të turizmit malor.

Në një postim në Facebook, ish-kryeministri theksoi nevojën për heqjen e masave kufizuese që aktualisht po pengojnë zhvillimin e këtij sektori të rëndësishëm ekonomik.

“Nuk ka vend normal që nuk i shfrytëzon resurset që ia ka falë natyra,” deklaroi Haradinaj, duke krahasuar situatën me vendet fqinje si Shqipëria, Mali i Zi dhe Maqedonia e Veriut, të cilat kanë zhvilluar kapacitete të admirueshme në turizmin malor. Ai theksoi se mijëra banorë të zonave malore kanë ndërtuar objekte që mund të shfrytëzohen për qëllime turistike.

Kandidati për kryeministër premtoi se pas zgjedhjeve të 9 shkurtit, ndër detyrat e tij të para do të jetë eliminimi i barrierave ligjore dhe administrative që aktualisht po pengojnë zhvillimin e turizmit në bjeshkët e Kosovës.

“Të gjitha këto objekte do të hyjnë në fazën e legalizimit dhe do të përfshihen në tërësinë e kapaciteteve turistike,” shtoi Haradinaj, duke nënvizuar nevojën për ndryshime në bazën ligjore, përfshirë edhe planin hapësinor.