HAGË – Dëshmitarja Jeliq për bashkëshortin e saj: Trupi i tij nuk është gjetur, dua të di se çfarë ka ndodhur

Duke u përgjigjur në pyetjet e mbrojtësit të viktimave, dëshmitarja Stamena Jeliq tha se trupi i burrit të saj nuk është gjetur kurrë dhe se dëshiron të dijë se çfarë i ndodhi atij.

Ajo tha se do të ishte mirë të ia gjenin të paktën një kockë në mënyrë që të iu bëhet një varrë atij ku bashkëshortja e tij mund ta qante, raporton “Betimi për Drejtësi”.

“Po e vërtetë është. Trupi i tij nuk është gjetur kurrë…Ajo se çfarë dua të dijë është ajo se çfarë i ka ndodhur bashkëshortit tim dhe do të ishte mirë që të paktën të gjenim qoftë edhe një kockë të vetme në mënyrë të tillë që t’i bënim një varr dhe të kisha një vend ku më në fund mund ta qaja atë”, tha Jeliq.

Dëshmitarja tha se zhdukja e bashkëshortit të saj ka pasur ndikim me atë dhe fëmijët e saj.

“Me besoni që ka pasur shumë ndikim mbi ne. Vajza ime ishte shumë e lidhur me të atin dhe kur u larguam nga Rahoveci për të shkuar në Mal të Zi, vajza nuk ka folur për një muaj, megjithëse ajo kishte filluar që të fliste. Ajo ulej në të njëjtin vend gjithmonë dhe e kishte frikësuar shikimin në një vend gjithë kohës ndërkohë që nuk nxirrte asnjë fjalë të vetme. Nuk fliste fare”, tha Jeliq.

Dëshmitarja Stamena Jeliq tha se ajo vetë nuk ishte funksionale as fizikisht dhe as mendërisht pas kësaj ngjarje.

“Sinqerisht unë nuk isha fare funksionale as fizikisht dhe as mendërisht dhe me pas kërkova ndihmë. Shkova u vizitova të një mjek dhe ai me tha disa gjëra të caktuara që fëmijët e mijë do të përfundonin në një qendër për fëmijë të braktisur dhe se ata nuk do të dinin që janë motër e vëlla me njëri-tjetrin, atëherë unë u mundova që ta mblidhja vetën dhe për një vit të plotë nuk isha mirë as fizikisht dhe as mendërisht. Megjithatë, pas një viti fal mjekëve fatmirësisht isha më mirë”, tha Jeliq.

Jeliq pohoi se pas një viti, nga Mali i Zi kanë shkuar për të jetuar në Serbi. Ajo tha se kur kanë arritur në Serbi, ajo ka punuar në një restorant për ushqime të shpejta, punë kjo që e bënë edhe sot.

Gjithashtu, dëshmitarja u pyet se çfarë ndikimi ka pasur për atë rritja e fëmijëve pa baba.

“Ka pas ndikim të jashtëzakonshëm. Edhe sot e kësaj dite, mungesa e babait ka ndikim për ata edhe pse sot ata janë të rritur. Ka pasur shumë ndikim mbi jetën time. Është shumë e vështire të jetosh diku dhe t’i rrisësh dy fëmijë pa asnjë lloj ndihme. Është shumë e vështirë kjo gjë dhe nuk do ia uroja askujt një fat të tillë. Edhe pse kjo ka ndodhur në të shkuarën, edhe sot e kësaj dite jeta nuk është fare e lehtë”, tha dëshmitarja.

Me kaq përfunduan pyetjet e mbrojtësit të viktimave për këtë dëshmitarë për të vazhduar më pas me mbrojtjen e Hashim Thaçit të përfaqësuar nga avokatja Nina Tavakoli.

Jeliq: Kam dëgjuar se Ismet Tara ishte përgjegjës për zhdukjen e serbëve në Rahovec

(Përditësuar, ora 10:40)-Dëshmitarja Stamena Jeliq tha se ka dëgjuar nga persona në Rahovec që në këtë zonë, përgjegjës për zhdukjen e serbeve që i kishte fqinjë duke përfshirë edhe burrin e saj ishte Ismet Tara.

“Personi përgjegjës për Rahovecin ka qenë Ismet Tara. Kam dëgjuar nga persona në Rahovec që ai ka qenë përgjegjës për zhdukjen e personave në fjalë. Vjehrra ime kur ka shkuar për të raportuar zhdukjen e djalit të saj ka shkuar për t’u takuar personalisht me Ismet Taren. Këtë ma ka thënë ajo personalisht”, tha dëshmitarja duke mohuar se është takuar vetë personalisht me Tarën.

Përpara kësaj, dëshmitarja tha se njërin prej serbëve e kishin rrahur dhe e kishin futur me një fugon nga i cili kishte arritur të arratisej, raporton “Betimi për Drejtësi”.

“Tihjomirin e kishin rrahur dhe me pas atë e morën me veturë të një lloji të caktuar me një si fugon, duart i kishte të lidhura dhe dëgjova që ai arriti që të ikte nga fugoni. Këtë e kam dëgjuar përmes fqinjit tim, Jella Gerkoviq”, tha dëshmitarja duke shtuar se burri i saj e kishte emrin Zveta.

Ajo tha se serbet e arrestuar ishin mbajtur të ndaluar në ish-stacionin e Policisë Serbe në Rahovec.

“Në Rahovec ku më përpara kanë qëndruar Policia dhe kur policia është larguar, ata janë mbajtur të ndaluar në stacionin e Policisë”, tha Jeliq duke shtuar se ata janë ndaluar nga UÇK-ja.

Me kaq përfunduan pyetjet e prokurorisë për këtë dëshmitare për të vazhduar më pas me pyetjet e mbrojtësit të viktimave, Simon Laws.

ZPS për dëshmitaren e 94-të: E ka të zhdukur bashkëshortin që nga koha kur u rrëmbye nga anëtarët e UÇK-së

Në Dhomat e Specializuara të Kosovës (DhSK) në Hagë ka filluar dëshminë dëshmitarja e 94-të e Zyrës së Prokurorit të Specializuar, Stamena Jeliq e cila mban kodin 01163 dhe është duke dëshmuar përmes video-lidhjes në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

Pyetjet për këtë dëshmitare i ka filluar përfaqësuesja e ZPS-së, prokurorja Alexandra Insinga. Gjatë përmbledhjes së lexuar në gjykatë, kjo dëshmitare e ka të zhdukur bashkëshortin që nga koha kur pretendohet se është marrë nga shtëpia e tij nga anëtarët e Ushtrisë Çlirimtare të Kosovës (UÇK).

Po ashtu, sipas ZPS-së, kjo dëshmitare ka parë rrëmbimin dhe keqtrajtimin e një komshiu të saj nga pjesëtarë të UÇK-së, raporton “Betimi për Drejtësi”.

“Në verën e 1999-ës, dëshmitari 01163-serbe jetonte në Rahovec së bashku me burrin e saj Marko Jeliq dhe me pjesëtar të tjerë të familjes. Me ose rreth datës 16 qershor 1999, 01163 ka qenë dëshmitare e rrëmbimit dhe keqtrajtimit e fqinjit të saj nga ushtarë të UÇK-së. Më vonë atë ditë, dëshmitari 01163 iu tha nga persona të tjerë që tre serb të tjerë që jetonin në afërsi ishin marrë në një automjet nga pjesëtar të UÇK-së. Më 9 gusht 1999, burri i 01163 u mor nga shtëpia e tij nga tre anëtarë të UÇK-së në prani të 01163 nga anëtarë të UÇK-së. Ai nuk u kthye kurrë në shtëpi dhe është i zhdukur që nga ajo kohë. Nëna e Marko Jelliq ka kontaktu komandantin e UÇK-së në atë kohë për të marrë informacion lidhur me djalin e saj, por pa sukses. Nga gjithë serbët e rrëmbyer vetëm trupi-kufoma e Panta … është gjetur”, tha prokurorja gjatë leximit të përmbledhjes.

“Ajo që kam thënë atëherë do ta thoja edhe tani. Të njëjtën gjë”, tha Jeliq kur u pyet se a i qëndron prapa deklaratave që kishte dhënë më herët.

Dëshmitarja tha se emrat e këtyre personave janë Zveta Gergoviq, Nego Dediq, Tihomjer Milkoviq e po ashtu edhe Marko Vidoseviq.

Si rrjedhojë u pranuan në prova materiale në gjuhën shqipe, serbe dhe angleze deklaratat e më hershme të dëshmitares të cilat i ka dhënë në autoritetet e drejtësisë vite më parë.

Këto deklarata u klasifikuan si publike për t’u përdorur për kundërpyetje por jo për publikun.

Sipas kryetarit të trupit gjykues, Charles Smith III, dëshmia e kësaj dëshmitare do të zgjasë rreth një ditë e që një orë e gjysmë nga kjo kohë janë ndarë për pyetjet e Prokurorisë. Mbrojtësi i viktimave ka parashtruar se i duhen rreth 15 minuta ndërsa mbrojtjes së të akuzuarve iu duhen rreth dy orë e gjysmë për kundërpyetjet e tyre.

Përpara kësaj, trupi gjykues dha urdhër lidhur me kundërshtimet për kronologjinë e provave të paraqitura nga mbrojtësi i viktimave dhe për kërkesën e mundshme të tyre për dëmshpërblim.

“Është përcaktuar afati kohor lidhur me kundërshtimet për kronologjinë e provave të paraqitura nga mbrojtësi i viktimave dhe kërkesën për dëmshpërblim. Trupi gjykues ka konstatuar se gjatë seancës së djeshme mbi ecurinë e çështjes, mbrojtësi i viktimave ka parashtruar se korniza ligjore e DhSK-së, çështjet që janë pjesë e viktimave pjesëmarrëse në këtë procedurë do të paraqitën pas mocionit i mundshëm që mund të paraqiten sipas rregullës 130 dhe mbi të cilën mund të marri një vendim trupit gjykues. Po ashtu, mbrojtja e viktimave parashtrojë që synon të paraqes kërkesë për dëmshpërblim pas aktgjykimit të dhënë nga trupi gjykues”, tha Charles Smith III.

Tutje, Smith urdhëroi palët lidhur me parashtrimet e tyre sa i takon kësaj kronologjie të parashtruar nga mbrojtësi i viktimave.

“Palët urdhërohen që të parashtrojnë kundërshtimet e tyre sa i përket kronologjisë siç është parashtruar nga mbrojtësi i viktimave me afat për të hënën me 2 dhjetor 2024”, tha Smith III.

Ndërsa, urdhri i dytë kishte të bënte me kërkesën e ZPS-së për rivlerësim të pjesshëm të një vendimi të trupit gjykues të 30 shtatorit 2024. Mbrojtja kishte pohuar se nuk e ka kundërshtuar kërkesën e prokurorisë për sa kohë disa redaktime mbahen ashtu sic janë për cka ishte pajtuar edhe ZPS-ja. Kështu, trupi gjykues aprovoi kërkesën e ZPS-së pas arritjes së marrëveshjes në mës palëve duke ndryshuar më pas vendimin

Vlen të theksohet se të gjithë të akuzuarit janë prezent në sallën e gjyqit përmes video-lidhjes.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /BetimipërDrejtësi