Gjykata Kushtetuese e Kosovës bëhet anëtare e Konferencës Evropiane të Gjykatave Kushtetuese

Gjykata Kushtetuese e Kosovës ka njoftuar përmes një komunikate se janë bërë pjesë e Konferencës Evropiane të Gjykatave Kushtetuese.
“Në Takimin Përgatitor të Qarkut të Presidentëve të Kongresit të 20-të të Konferencës Evropiane të Gjykatave Kushtetuese (KEGJK), organizuar nga Gjykata Kushtetuese e Republikës së Shqipërisë në Tiranë, Gjykata Kushtetuese e Republikës së Kosovës është pranuar Anëtare me të drejta të plota e këtij forumi prestigjioz të gjykatave kushtetuese dhe supreme evropiane”, thuhet në njoftim.
Kërkesa për anëtarësim është bërë nga kreu i Kushtetueses, Nexhmi Rexhepi, i cili në fjalimin e tij ndër të tha se, “synimi ynë nuk ka qenë kurrë të ndjekim një avantazh politik duke iu bashkuar KEGJK-së, por përkundrazi, të zëmë vendin e merituar në mesin e anëtarëve të një komuniteti që mbështet vlerat e demokracisë, sundimit të ligjit dhe mbrojtjes së të drejtave të njeriut dhe lirive themelore në kontinentin evropian. Gjykata jonë është dëshmuar se është një gardiane e pasionuar e këtyre vlerave”.
Konferenca Evropiane e Gjykatave Kushtetuese (KEGJK) është themeluar në vitin 1972, me një anëtarësi prej 40 gjykatash kushtetuese dhe supreme të vendeve evropiane.