Gërvalla udhëton në Slloveni për të marrë pjesë në Forumin e Bledit – MPJ tregon çfarë do të theksojë atje

Me ftesë të Zëvendëskryeministres dhe Ministres së Punëve të Jashtme dhe Evropiane të Sllovenisë, Tanja Fajon, Zëvendëskryeministrja dhe Ministrja e Punëve të Jashtme dhe Diasporës, Donika Gërvalla, ka udhëtuar në Slloveni për të marrë pjesë në Forumin Strategjik të Bledit, që mbahet më 2 dhe 3 shtator 2024.

Sipas njoftimit të MPJD-së, “gjatë këtij forumi, Ministrja Gërvalla do të paraqesë përkushtimin e Republikës së Kosovës për të luajtur një rol aktiv dhe konstruktiv në avancimin e strategjive rajonale dhe globale për paqe, siguri dhe stabilitet”.

“Ministrja Gërvalla gjatë paneleve dhe takimeve do të theksojë përparimin që Kosova ka arritur në përmbushjen e kushteve në procesin e integrimeve euroatlantike, reformat e thella në sundimin e ligjit, avancimin e demokracisë dhe zhvillimin ekonomik. Ministrja Gërvalla do të nënvizojë gjithashtu rëndësinë e bashkëpunimit multilateral për të adresuar dhe tejkaluar sfidat globale, duke pozicionuar Kosovën si një partner të besueshëm të shteteve demokratike dhe të përkushtuar në skenën ndërkombëtare”, njofton ministria.

Tutje, sipas MPJD-së “në kuadër të pjesëmarrjes së saj në Forumin Strategjik të Bledit, Ministrja Gërvalla do të zhvillojë takime me ministrat e jashtëm të vendeve pjesëmarrëse, përfaqësues të institucioneve globale, shoqëri civile dhe medie, duke thelluar marrëdhëniet diplomatike dhe duke promovuar interesat e Kosovës në arenën ndërkombëtare”.