Fury e zbulon se do të kandidojë për kryeministër të Britanisë së Madhe

Kampioni i peshave të rënda në boks, Tyson Fury, ka lënë të kuptohet se do të kandidojë për kryeministër në vitin 2030, pas hapjes së restorantit të tij të ri në Lancaster.

Dy herë kampioni botëror i peshave të rënda i dha fund karrierës së tij në boks në muajin prill pasi e mposhti Dillian Whyte në Wembley, përcjell KosovaPress.

Pas dorëheqjes së Boris Johnson në fillim të korrikut, Rishi Sunak dhe Liz Truss kanë nisur një luftë për t’u bërë kryeministri i ardhshëm i Britanisë së Madhe, dhe kjo është një luftë që “Gypsy King” po e synon potencialisht në të ardhmen.

Fury foli me fansat në hapjen madhështore të restorantit “Sultan of Lancaster Experience” dhe zbuloi se një ditë ka plane për të udhëhequr vendin e tij, Britaninë e Madhe.

“Dua të falënderoj të gjithë ata që u paraqitën sot. Mos harroni të votoni për mua në vitin 2030 si Kryeministër i Mbretërisë së Bashkuar, votoni Furyn”, tha Fury.

Pavarësisht tërheqjes së tij nga boksi profesionist, Fury ka flirtuar me një rikthim fitimprurës në ring, nëse rivali britanik Anthony Joshua fiton në revanshin e tij kundër Oleksandr Usyk në muajin e ardhshëm.

Megjithatë, 33-vjeçari para ca kohësh tha se do të përballej vetëm me fituesin e meçit për një shumë afro 600 milionë eurosh.