Flet trajneri i Lituanisë para ndeshjes me Kosovën

Me fillim nga ora 20:45, Kombëtarja e Lituanisë do të zhvilloj sot ndeshje kundër Kosovës, ku është mysafire në stadiumin “Fadil Vokrri”.

Trajneri i “Dardanëve” Bernard Challandes e konfirmoi mbrëmë se për ndeshjet kundër Lituanisë, Suedisë dhe Spanjës do të jetë pa shërbimet e mbrojtësit të Napolit Amir Rrahmani, kurse në anën tjetër Valdas Urbonas, i cili është trajner i Lituanisë, e ka konfirmuar se në këtë ndeshje do të mungoj Paul Golubick.

Po ashtu, para ndeshjes me Kosovën, trajneri Urbonas u pyet rreth “Dardanëve”, ku tregoi që skuadra e tije do ta cilësoj këtë ndeshje të vështirë, pavarësisht faktit që është miqësore, përcjell KosovaPress.

“Kosova ka ekip të fortë, do të jetë një përballje e vështirë, por ne i kemi objektivat tona që dëshirojmë t’i arrijmë, zhvillojmë ndeshje të dielën kundër Zvicrës, kurse kundër Kosovës do kërkojmë ti arrijmë qëllimet tona”, tha trajneri i Lituanisë, Urbonas.

Po ashtu, në konferencë për media foli edhe portieri Tomas Svedkuskas, ku tregoi se edhe pse është miqësore, kombëtarja e tij duhet të tregoj seriozitet.

“Pavarësisht që kjo nuk është ndeshjes zyrtare, trajneri na ka thënë që nuk ka miqësore dhe do të luftojmë vetëm për fitore. Skuadra e Kosovës është e mirë, ka lojtar shumë të mirë që luajnë në Bundesligën gjermane dhe në Serie A, nuk do të jetë ndeshje e lehtë për ne”, tha portieri Svedkauskas.

Kosova do të nis vitin 2021 me miqësoren kundër Lituanisë, kurse më pas do të vazhdojë me përballje kundër Suedisë dhe Kombëtares së Spanjës.