Drenica shokon Ballkanin, Prishtina mposht pa probleme Llapin
Kanë përfunduar dy ndeshjet e javës së 32-të në Superligë që kanë filluar sot nga ora 15:00, shkruan Periskopi.
Drenica ka shkaktuar sensacion duke mposhtur Ballkanin me rezultat 2-1, njëherit duke ia mohuar skuadrës nga Suhareka vendin e parë.
Golat nga Uka 19′ dhe Denisson 50′ ia siguruan fitoren nikoqirëve, ndërsa golin e vetëm për mysafirët e shënoi Zeka në minutën e 51-të.
Ballkani me këtë disfatë lëshoi rast të artë ta rrëmbente primatin në Superligë, teksa tash mbetet në vendin e tretë me 67 pikë, dy më pak se lideri Prishtina, që kaloi në të parin pasi mposhti Llapin sot si mysafire.
Kryeqytetasit triumfuan me rezultat 3-1, falë golave nga Mankenda 15′, Bekteshi 42′ dhe John 64′.
Golin e vetëm për llapianët e shënoi Aliu në minutën e 19-të.
Pas këtyre disfatave, Drenica dhe Llapi renditen në pozitat 8 respektivisht 5. /Periskopi.com/
