Berisha: Ka naivitet në Kosovë, mendohet se Evropa ka borxh ndaj nesh

Ish-zëvendësministri i Kosovës, Anton Berisha, ka thënë se në Kosovë ekziston besim i përhapur se Evropa i detyrohet vendit dhe se duhet të ofrojë vazhdimisht mbështetje në negociatat me Serbinë.

Sipas Berishës, ekziston një naivitet i dukshëm në Kosovë lidhur me detyrimet e Evropës dhe pritshmëritë e Bashkimit Evropian (BE) në lidhje me dialogun e vazhdueshëm me Serbinë.

Berisha ka argumentuar se qasja e BE-së është e udhëhequr nga konsiderata pragmatike të kapacitetit dhe të aftësisë, dhe jo nga një ndjenjë borxhi.

Ai ka theksuar se perceptimi i Kosovës si një shtet me kapacitete të rëndësishme ekonomike, ushtarake dhe historike nuk përputhet me realitetin e saj aktual.

Berisha ka theksuar se qasja e vendit—e shënuar nga optimizmi i tepruar—ka çuar në pengesa, duke u larguar nga progresi i arritur në shtetet e tjera rajonale.

“Ka një naivitet këtu në Kosovë se Evropa është në borxh ndaj neve dhe vazhdimisht duhet të na japin në raport me Serbinë. Në anën tjetër, e kemi politikën reale në të cilën shtetet duhet të sillen në proporcion me kapacitetet e tyre që kanë. S’mund të sillet Kosova si një shtet që e ka një ekonomi që s’e ka, një kapacitet ushtarak që s’e ka dhe një traditë s’e ka. Sillet me një megallomani të paparë, që po i sjell rezultatet në kthim prapa. Ajo që Macron tha është që nuk na bëhet vonë për marrëveshjet, nëse palët duan të ecin përpara.. sepse edhe ashtu mekanizmi i BE-së është mosintegrimi si masë ndëshkuese apo sanksionet si na ndodhi ne”, tha ai.

Ish-zëvendësministri gjithashtu ka folur komentet e presidentit francez, Emmanuel Macron, në lidhje me këtë çështje. Sipas tij, Macron-i ka sugjeruar se BE-ja është indiferente ndaj marrëveshjeve, por është më e fokusuar nëse palët e përfshira janë të gatshme të ecin përpara.

Ish-zëvendësministri ka shprehur kritikën e tij me strategjitë politike të brendshme të Kosovës, të cilat ai beson se kanë dështuar të adaptohen në këto realitete. Sipas Berishës, Serbia vazhdon të përparojë, ndërsa Kosova mbetet pas në reforma, zhvillim ekonomik dhe mbështetje ndërkombëtare, duke e penguar më tej integrimin e saj evropian.

“Evropa nuk është e interesuar ta mbajë Serbinë të izoluar edhe sikur të mos ishte rasti i Rusisë. Ka një histori paradhëniesh shteteve evropiane me Serbinë dhe rajonin, siç e kanë krijuar Greqinë, Serbinë. Ne kemi mbet të fundit për t’u krijuar, në një kompensim pas 100 vjetësh. Politika s’e ka marrë këtë mesazh, zhvillon një politikë të brendshme elektorale, përditë Serbia po ec para, ne po ecim prapa edhe në reforma edhe në ekonomi dhe në atë që e kemi quajtur simpati ndaj shqiptarëve, që me këtë politikë sigurisht që BE nuk na lë hapësirë, me mendime dhe debate mesjetare Evropa i ka kaluar para qindra vitesh”, ka thënë ish-zëvendësministri Anton Berisha”, tha ai./dukagjini