Benzema pas ndeshjes: Nga minuta e 15-të ne pamë Real Madridin sonte
Skuadra e Real Madridit ka deklasuar Liverpoolin në “Anfield”, duke fituar me rezultatin 2:5.
Liverpool shënoi dy gola të shpejtë me Nunez dhe Salah për 14 minuta, por gjithçka barazoi Vinicius me dy gola në pjesën e parë. Në pjesën e dytë, Militao dhe Benzema dy herë shënuan për turpërimin e “Reds”.
Pas ndeshjes, Benzema foli për mediumet ndërkombëtare, ku u shpreh shumë i lumtur me fitoren e ekipit të tij, teksa falënderoi tifozët për mbështetjen e madhe sonte.
“Nga minuta e 15-të ne pamë Real Madridin. Futbolli është gjithmonë i vështirë. Ata kanë hyrë më mirë se ne. Një gol ndryshon lojën, si ai i Vinícius. Falë tifozëve tanë, ata janë njeriu i 12-të”, tha fillimisht Benzema.
“Ne jemi mirë, por do ta bëjmë një tjetër lojë në Bernabeu. Futbolli është futboll, ne e dimë se si gjërat mund të ndryshojnë.”
“Kjo fitore është për Amancio, presidentin tonë të nderit”, përfundoi ai.
