Arrestohet dhe ndalohet 48 orë ministri Fikrim Damka, dyshohet se ka sulmuar fizikisht dy persona
Ministri i Zhvillimit Rajonal, Fikrim Damka, është ndaluar për 48 orë, pasi dyshohet se dje, ka sulmuar fizikisht dy persona.
Kjo u konfirmua nga kryeprokurori i Prizrenit, Petrit Kryeziu.
Sipas Kryeziut, rasti nuk ka të bëjë me vepra të cilat lidhen me zgjedhjet parlamentare që janë mbajtur të dielën.
Rasti është konfirmuar nga Policia e Prizrenit.
“Dje me datë 09.02.2025 rreth orës 18:00 në Prizren është raportuar një rast ‘Kanosje dhe Sulm’ , Policia ka intervistuar të dyshuarit F.D. dhe F.D dhe viktimat si dhe janë mbledhur edhe prova dhe dëshmi tjera”, ka thënë zëdhënësi Shaqir Bytyqi.
Damka është kryetar i Partisë Demokratike Turke të Kosovës, e cila ka garuar në zgjedhjet parlamentare.
Ndryshe, Damka është kryetar i partisë Kosova Demokratik Türk Partisi – KDTP.
