Arrestohen dy persona, dyshohen për grabitje në një pompë derivatesh
Policia e Kosovës ka njoftuar se të mërkurën janë arrestuar dy persona të dyshuar për grabitje.
Sipas njoftimit të Policisë rasti ka ndodhur me datën 24 janar në fshatin Trudë, në një pompë derivatesh.
“Puna e hetuesve policor ka rezultuar me identifikimin dhe arrestimin e personave të dyshuar (meshkuj) V.I. 34 vjeç, dhe L.B. 33 vjeç, të dy shtetas të Republikës së Kosovës, për të cilët ekziston dyshimi se të njëjtit kanë qenë të përfshirë në rastin e grabitjes”, thuhet në njoftimin e Policisë.
Personat e dyshuar me vendim të prokurorit thuhet se janë ndaluar në mbajtje derisa hetuesit po kryejnë të gjitha veprimet e nevojshme hetimore e procedurale lidhur me rastin.
