Ambasadori britanik kritik ndaj mbishkrimeve anti-Kosovë rrugëve të Beogradit: Mund të bëjmë më mirë se aq

Ambasadori i Britanisë së Madhe në Serbi, Edward Ferguson, ka folur sot për raportet ndëretnike në rajonin e Ballkanit Perëndimor dhe përpjekjet që bëhen për normalizimin e raporteve në mes të Kosovës dhe Serbisë. Ferguson ka thënë se mund të bëhet shumë më mirë në këtë aspekt sesa grafitet dhe mbishkrimet që shihen rrugëve të Beogradit.

Këtu ai ka përmendur mbishkrimin fyes ndaj shqiptarëve “kur ushtria të kthehet në Kosovë” që shihet rrugëve të Begoradit dhe ka pyetur se si mund të ndjehet një i ri shqiptar që jeton në Serbi i cili viziton Beogradin për herë të parë dhe sheh një fyerje të tillë

“Ambasada ime punon intensivisht me komunitetet pakicë në të gjithë Serbinë – boshnjakë, rom dhe shqiptarë, dhe shpesh i sjellim në Beograd për seminare dhe kurse. Megjithatë, disa prej tyre më thanë se për shkak të disa grafiteve që shohin në qytet, ndjehen të pasigurt dhe jo rehat, a mund ta imagjinoni se si ndiheni si një i ri shqiptar që jeton në Serbi, i cili vjen për herë të parë në kryeqytet dhe sheh fyerje në nivel kombëtar ose mbishkrime në mure me mbishkrimin: “Kur ushtria të kthehet në Kosovë”. Sigurisht që mund të bëjmë më mirë”, ka deklaruar Ferguson.