Afrim Toverlani emërohet trajner i Kombëtares U21
Komiteti Ekzekutiv i FFK-së sot mbajti mbledhjen e vet të radhës nën drejtimin e presidentit Agim Ademi, ku diskutoi shumë çështje me rëndësi për futbollin e Kosovës.
KE i FFK-së ka vendosur që trajner për U21 ta emërojë Afrim Toverlanin.
KE analizoi përgatitjet për edicionin e ri të garave 2022/23. Kështu që Komisionet dhe organet kanë marrë të gjithë hapat e nevojshëm për fillimin sa më të mirë të garave dhe me një dinamikë në përputhje edhe me fillimin e Kampionatit Botëror Katari 2022. Po ashtu Komisioni i Gjyqtarëve me mbështetje të ekspertëve nga FIFA kanë mbajtur seminarin për gjyqtarë. KE është plotësisht i vetëdijshëm se rrethanat ekonomike nuk janë në favorin e klubeve ndaj në këtë drejtim do të ndërmarrë masat e duhura për t’i ndihmuar klubet për përballimin e gjendjes. KE konstatoi se afati kalimtar por rrjedhë normalisht, sikur që FFK-ja tashmë për sistemin VAR sa i përket resurseve njerëzore është plotësisht e gatshme që ta zbatojë atë edhe në Ligën e Parë.
“KE shqyrtoi ecurinë e ekipeve kombëtare dhe në këtë drejtim mori vendim që për përzgjedhës të Kombëtares U21 të emërojë futbollistin e spikatur dhe trajnerin më të trofeshëm në futbollin e Kosovës, Afrim Tovërlani. Po ashtu KE mori vendim që të bëhet riorganizimi i trajnerëve për ekipet kombëtare të femrave për të gjitha grup moshat”, thuhet ne njoftimin e FFKsë.
KE diskutoi edhe për gjendjen e fushave sportive dhe vazhdimisht po punon në përmirësimin e infrastrukturës.
KE shqyrtoi edhe hartimin e strategjisë si dhe ndryshimin e plotësimin e Rregulloreve dhe akteve tjera të FFK-së.
KE mori vendim që të vazhdohet me punët në selinë e FFK-së, në Kampin Edukativ në Hajvali dhe rifillimin e punime në Kampin Nacional në Obiliq, po edhe për vazhdimin e projekteve sipas memorandumeve me komunat e Kosovës si dhe me Ministrinë e Kulturës, Rinisë dhe Sportit me qëllim të përmirësimit të infrastrukturës sportive.
KE shqyrtoi edhe parashtresa dhe ankesat drejtuar këtij organi.
