1 milion raste të reja të infeksioneve seksuale çdo ditë

Seks i mbrojtur? Edhe sot duket utopi. Në fakt, ka mbi një milion raste të infeksioneve seksualisht të transmetueshme (SST) në botë çdo ditë. Sipas hulumtimeve të reja nga Organizata Botërore e Shëndetit, infeksionet më të përhapura janë katër: klamidia, gonorrea, trikomoniazi dhe sifilizi.

Të dhënat më të fundit

Në detaje, sipas raportit të OBSH-së, në vitin 2016 kishte 127 milion raste të reja të klamidias, 87 milionë të gonorreas, 6.3 milionë raste me sifiliz dhe 156 milionë trikomoniazë. Mesatarisht 1 në 25 persona ka të paktën një nga këto infeksione seksualisht të transmetueshme dhe në disa raste edhe më shumë se një. Në krahasim me anketën e mëparshme, që daton që nga viti 2012, nuk është arritur asnjë përparim. Përqindja, në të vërtetë, mbeti pothuajse e njëjtë.

Infeksionet seksuale janë shumë të fshehta. Në fakt, nëse nuk identifikohen me kohë dhe nuk trajtohen siç duhet, ato mund të shkaktojnë pasoja të rëndësishme, të tilla si sëmundjet neurologjike dhe kardiovaskulare, infertilitet, shtatzëni ektopike, vdekshmëri perinatale dhe rrezikun e shtuar të HIV-it. Për këtë arsye, duhet të bëhet çdo përpjekje për të rritur vetëdijen për këtë çështje. “Këto infeksione janë kudo dhe janë më të përhapura nga sa besohet, por ka pak vëmendje dhe stigma është ende shumë e fortë. SST duhet të konsiderohen në të njëjtën mënyrë si të gjitha infeksionet e tjera. Ne kemi nevojë për fushata ndërgjegjësuese për të inkurajuar qytetarët të bëjnë ekzaminim, përhapjen e informacionit mbi rreziqet e këtyre infeksioneve dhe rregullat e parandalimit përmes mediave, por edhe në shkollë dhe brenda familjeve”, konfirmon Teodora Wi, ekspert e SST në OBSH.

Si të mbroheni?

Para së gjithash, shmangni marrëdhëniet e pambrojtura. Është gjithashtu e rëndësishme të mos shkëmbeni peshqirë dhe të respektoni higjienën e kujdesshme personale. Dhe, në rast të simptomave të dyshimta, kërkoni këshillë mjekësore menjëherë pa siklet.