Iniciohet projektimi i dytë brenda një dekade i Teatrit të Operës

Dhjetë vjet pasi është bërë projekti i parë dhe shtatë të tjera pasi është vënë guri themeltar, Ministria e Kulturës ka hedhur hapin e parë për projektin e dytë të teatrit të operës dhe baletit “Dr. Ibrahim Rugova”, shkrua sot Koha Ditore.

Projektimi i dytë për këtë objekt do të bëhet pasi janë shpenzuar mbi një milion euro të buxhetit shtetëror për projektin e parë dhe gur themelin e vënë në vitin 2009. Procedurat do të nisin prej fillimit, meqenëse projekti i parë qe shpallur i pavlefshëm.

Ministria e Kulturës ka hapur konkurs publik për atë që quhet “Detyrë projektuese”. Në konkursin njëjavor që është mbyllur të martën, ofertat i kanë bërë katër kompani.