Jovanoviq, politikani serb që u shpëtoi shumë atentateve (Çka tha sot në Kosovë)

Kryetari i Partisë Liberale Demokratike të Serbisë, Çedomir Jovanoviq ka deklaruar se nuk e di çka do të përfitojë Serbia, derisa vazhdon të injorojë faktin se Kosova sot është një shtet i pavarur nga Serbia.

Jovanoviq në tryezën “Finalja e dialogut Kosovë-Serbi”, të organizuar nga Instituti Demokratik i Kosovës, ka thënë se Serbia duhet ta thotë se dëshiron veriun e Kosovës, në mënyrë që të pranohet pavarësia e shtetit tuaj.

Ai tha se shqiptarët e Kosovës duhet ta kuptojnë pozitën e serbëve në veri të Kosovës, ku pritet ajo që ka ndodhur nga serbët e Bosnjës dhe Kroacisë, të cilët në emër të politikës së paqëndrueshme.

“Unë kam mbështetur marrëveshjen e Brukselit të vitit 2013, natyrisht mbështes edhe dialogun që po udhëhiqet, edhe pse në disa situate kam mendim ndryshe,.. Unë problemin e shoh në anën tjetër, vërej se është ndërruar retorika, vërej se për kryetarin Vuçiq nuk është sot problem të thotë se është dëgjuar me kryetarin Thaçi etj, por më shqetëson gjendja e përgjithshme në të cilën ndodhet shoqëria ime, e cila nuk është e aftë të kuptojë realitetin, njëjtë sikurse në të kaluarën. Prandaj nuk besoj në marrëveshjet pas të cilave qëndrojnë individët. Kjo në një mënyrë është kërcënim për të gjithë, duke përfshirë këtu edhe Kosovën dhe mënyrën se si do t’i qasemi të vërtetës rreth Kosovës. Duhet të ndodhë pra transformimi edhe brenda shoqërisë tonë.  Unë e kam fjalën për Beogradin, ku politika duhet të udhëhiqet në një mënyrë krejt ndryshe, sepse ajo është shumë kontradiktore. Ne po bis edojmë me Prishtinën, ndërkohë që karateistët nuk mund të hynë në Serbi, sepse janë përfaqësues të një shteti që duhet marr pjesë në një kampionat evropian në Novi Sad”, tha ai.

Sipas tij, nuk e di çka do të ketë më mirë Serbia me injorimin e faktin që Kosova është e pavarur.

“Unë mendoj se ne në radhë të parë duhet të kemi parasysh idenë e paqes, mirëkuptimit, reciprok dhe aftësisë që në një mënyrë ndryshe t’i zgjidhim problemet tona. Shpresoj se kjo mënyrë do të vie në shprehje gjatë bisedimeve që ndodhen para nesh.. edhe pse s’ka mbetur çka për t’u biseduar më, sepse ajo që ka ndodhur deri tash sipas meje është një pako definitive dhe unë vërtetë nuk e di në çfarë mënyre Serbia do ta ketë më mirë, derisa vazhdon të injorojë faktin sipas të cilit Kosova sot është një shtet absolutisht i pavarur nga Serbia”, tha ai.

“Çka Beogradi dëshiron? Beogradi dëshiron diçka.. e ju sigurisht thoni se kjo është e pamundur…Duhet të ulemi këtu para jush dhe të themi, këtë duam…veriun e Kosovës, atje moti nuk po bëhet jetë normale.. duhet thënë na e jepni veriun e Kosovës ne pranojmë pavarësinë e shtetit tuaj”, tha Jovanoviq.

Zëvendëskryeministri i Qeverisë së Kosovës, Enver Hoxha ka thënë se në dialogun me Serbinë janë arrit shumë marrëveshje por implementimi i tyre është bërë shumë pak, duke rregulluar pjesërisht jetën e qytetarëve të Kosovës.

Kush është në të vërtetë politikani serb që e njeh Kosovën dhe i shpëtoi shumë atentateve?

Çedomir Jovanoviq i Partisë Liberaldemokrate serbe është deputet në parlamentin sërb dhe i ka bërë thirrje vendit të tij që të njohë pavarësinë e Kosovës, përcjell Periskopi.

Aktivizmi i tij politik ka bërë që ndaj tij të bëhen disa tentim-vrasje dhe sulme fizike. Më 6 shkurt të vitit 2001, një pajisje shpërthyese i kishte shkatërruar veturën. Pastaj, më 31 mars, ai poashtu u sulmua gjatë skenës së arrestimit të Millosheviqit, derisa po punonte si negociator. Në korrik të 2002-s, Ministri i Brendshëm, Dushan Mihajloviq, kishte thënë se Çeda kishte qenë në të gjitha listat e vrasjeve të “qendrave të pushtetit”.

Në vitin 2004, ai u dëbua nga Partia Demokratike pasi i kishte shkelur protokollet e partisë. Në nëntor të vitit 2005, ai themeloi partinë e tij të quajtuar Partia Liberal Demokrate. Ai ka qenë dy herë kandidat për president, në vitin 2008 dhe 2012.

Çedomir Jovanoviq ka lindur në një klasë të shtresës së mesme në Beograd.

Koha sa e kishte bërë shërbimin ushtarak, në Bosnje, gjatë kohës së luftës – i kishte injektuar atij ide të reja dhe megjithëse njëherë ishte krenuar me përvojën ushtarake, më vonë kishte ndjerë pendim për të.

Ai ka studituar për dramaturgji, por asnjëherë nuk ka punuar në profesionin e tij, duke i shkruar vetëm disa drama të cilat kurrë nuk u vunë në skenë e as publikuan.

Jovanoviqi ishte një prej liderëve studentorë që protestuan në Beograd gjatë dimrit të viteve 1996/97. Gjatë kësaj kohe ai ishte i ndjekur nga Shërbimi i Sigurimit shtetëror. Protestat nuk kishin qenë paqësore dhe kishin rezultuar me shumë përplasje me policinë, në shumë raste.

Ai u zgjodh si deputet qysh në zgjedhjet parlamentare të vitit 2000, kur ishte 27 vjeç për t’u bërë më pas cak sulmesh të ndryshme që kishin të bënin me qëndrimet e tij, shkruan Periskopi.

Në kohën kur një njësi qeveritare e maskuar e kishte rrethuar vilën e fortifikuar të Millosheviqit, Jovanoviqi kishte negociuar me të dhe e kishte bindur që të dorëzohej paqësisht. Ai ka treguar se gjatë asaj kohe sa Millosheviqi po dorëzohej në polici, e bija e tij Marija, i kishte kërkuar atij të bënte vetëvrasje e të mos dorëzohej. Ndërsa Millosheviqin e kishin marrë autoritetet, Jovanoviqi ishte larguar nga sigurimi pas së cilës Maria kishte shtënë me revole në makinën ku ishte ulur politikani sërb.

Çedomir Jovanoviq kishte thënë se më shumë ishte frikësuar mos bodigardët do ta qëllonin Marijan, të bijën e Millosheviqit, se për jetën e tij.

Jovanoviq ka qenë poashtu i akuzuar nga oponentët e tij politikë për lidhjet me mafian serbe, konkretisht me liderin e klanit mafioz Zemun dhe të personit që u dënua për organizimin e vrasjes së kryeministrit serb Zoran Gjingijq.

Përveçse e njeh pavarësinë e Kosovës, ai është shprehur edhe se Republika Srpska është krijuar nga një gjenocid – duke shkaktuar reagime të ashpra në vendin e tij.