Vendimi i gjigantit të madh gjerman vjen në momentin kur Gjermania po angazhohet që të zvogëlojë emetimin e  gazrave të dëmshme pas skandalit të mashtrimit.

Në kompaninë VW thonë se blerësve do t’iu ofrohet zbritje për automobilat, të cilat përmbushin standardin e ri Euro 6 prej dy mijë euro për automobila kompakt e deri dhjetë mijë euro për xhipin Touareg.

Prodhuesi i automobilave ka propozuar lirimin shtesë prej 1.000 deri 2.380 eurosh për të gjithë blerësit e automjeteve elektrike.  Oferta në para të gatshme do të vlejë deri në fund të vitit 2017, ka thënë një zyrtar i VW-së.

Sipas këtij zyrtari, kompania është duke menduar edhe për zgjerimin e këtij plani jashtë Gjermanisë, në mënyrë që të mbulojë gjithë Evropën.

Propozimi i kompanisë gjermane vjen pas samitit të qeverisë dhe industrisë javën e kaluar për zgjidhjen e nivelit të lartë të gazrave të emetuara nga automjetet me dizel.