“Mural Fest” bën thirrje për mbrojtjen e mjedisit

Me temën “Mbrojtja e mjedisit”, festivali ndërkombëtar i muraleve, “Mural Fest”, në edicionin e dytë synon të tërheqë vëmendjen e qytetarëve të Ferizajt me një lobim artistik kundër ndotjes së ajrit.

Edicioni i sivjetmë do të mbahet midis datave 17 e 23 të muajit maj. Lokacionet në të cilat do të vendosen muralet tashmë janë përzgjedhur dhe është hapur konkurs ndërkombëtar për tri krijime – skica.

Konkursi do të mbyllet në fund të këtij muaji dhe në fillim të muajit që vjen do të bëhen publikë emrat e tre fituesve.

Konkursi është thirrje për të gjithë krijuesit figurativë nga Kosova dhe bota, të cilët mund të prezantojnë idetë e tyre, përfshirë vizatime, piktura, apo në teknika të tjera kreative të përshtatshme për t’u realizuar në hapësira të mëdha, përkatësisht në formë murali.

Lebibe Topalli, drejtoreshë e festivalit “Mural Fest”, ka thënë se organizimi i edicionit të dytë i këtij festivali është duke shkuar siç duhet./ Koha.net/