PZAP vendosi në favor të tyre, reagon LDK: Përpjekjet e Vetëvendosjes për të uzurpuar procesin zgjedhor me manipulime do të sfidohen

PZAP-ja ka njoftuar se e refuzoi si të pabazuar ankesën e LVV-së të paraqitur kundër KQZ-së për shpalljen e rezultateve përfundimtare për zgjedhjet, ku pati kërkuar që të anulohen rezultatet e votimit me postë për LDK-në dhe kandidatët e saj, gjithsej 18,933 vota dhe që këto të largoheshin nga rezultatet përfundimtare.

Pas këtij vendimi, Lidhja Demokratike e Kosovës (LDK), ka reaguar duke thënë se VV-ja po mundohet me manipulu dhe delegjitimuar procesin zgjedhor.

Tutje në reagim kanë thënë se kushdo që shpif do të mbajë përgjegjësi ligjore, raporton Periskopi.

Po ashtu ata thonë se VV-ja po tenton ta uzurpojë prcoesin zgjedhor, por që si parti shprehen të bindur se nuk do ta lejojnë këtë.

Reagimi i plotë:

KOMUNIKATË PËR MEDIE

Lidhja Demokratike e Kosovës mirëpret vendimin PZAP-së i cili konfirmon se përpjekjet e Lëvizjes Vetëvendosje për të manipuluar dhe delegjitimuar procesin zgjedhor ishin të pabazuara dhe shpërfaqin mosgatishmërinë e tyre për të pranuar vullnetin e mërgatës sonë. Ky akt e dëshmon qartë se pretendimet e tyre ishin thjesht një përpjekje për të mbrojtur organizimin e vetëm partiak të manipulimit të votës së mërgatës të dokumentuar me video.

Lidhja Demokratike e Kosovës dënon ashpër fushatën e organizuar të shpifjeve dhe dezinformatave të Lëvizjes Vetëvendosje, e cila ka për qëllim të komprometojë procesin zgjedhor dhe të delegjitimojë rezultatet që nuk i përshtaten interesave të saj.

Lidhja Demokratike e Kosovës nuk do të tolerojë që Vetëvendosje të vazhdojë të përdorë shpifjet dhe manipulimet për të përmbysur vullnetin e qytetarëve dhe për të krijuar një realitet të rremë zgjedhor. Të gjithë ata që përhapin dezinformata me qëllim të cenimit të integritetit të zgjedhjeve dhe të institucioneve të pavarura do të mbajnë përgjegjësi ligjore. LDK do të ndjekë të gjitha rrugët ligjore për të paditur për shpifje të gjithë ata që përpiqen të ndikojnë në mënyrë të paligjshme dhe antidemokratike në rezultatet zgjedhore.

Lidhja Demokratike e Kosovës do të mbrojë integritetin e zgjedhjeve dhe vullnetin e secilit votues, brenda e jashtë Kosovës. Përpjekjet e Vetëvendosjes për të uzurpuar procesin zgjedhor me manipulime, shpifje dhe dezifnormata do të sfidohen me vendosmëri. Demokracia nuk mund të jetë peng i një partie që nuk e pranon vullnetin e lirë të qytetarëve.

Mbi të gjitha, LDK falënderon mërgatën për besimin dhe përkrahjen e pakontestueshme gjithnjë e në rritje.

Lidhja Demokratike e Kosovës do të vazhdojë të punojë të jetë edhe më afër mërgatës sonë, anembanë botës duke ju përgjigjur aspiratave tona të përbashkëta për një Kosovë të zhvilluar e të integruar në institucionet euro-atlantike.

LDK – Zyra e Informimit