“Para në këmbim të votave”: Rashiq akuzon Listën Serbe për dallavere
Ministri në detyrë për Komunitete dhe Kthim, Nenad Rashiq, ka deklaruar se Lista Serbe po tenton të manipulojë procesin zgjedhor duke ofruar shuma të mëdha parash për të anuluar votat e partisë së tij.
Për herë të parë, Lista Serbe është rrugës për të humbur një ulëse nga 10 të garantuara për serbët në Kuvendin e Kosovës. Kjo pasi një ulëse pritet ta marrë partia e Rashiqit.
Por, ministri në detyrë u shpreh se Lista Serbe po përpiqet të manipulojë votat për të siguruar pushtet absolut.
“Sot pasdite mora informacione nga bashkëpunëtorët e mi që janë vëzhgues, të cilët janë kontaktuar nga numra të panjohur duke iu ofruar para në këmbim të anulimit të votave tona. Kjo nuk po ndodh vetëm në një komunë, por në të gjithë Kosovën”, ka deklaruar Rashiq.
