Trump: Ukraina mund të bëhet ruse një ditë – Zelensky pritet të takohet me JD Vance
Presidenti i SHBA-së, Donald Trump, ka deklaruar se Ukraina “mund të bëhet ruse një ditë”. Deklarata vjen ndërsa zëvendëspresidenti i tij, JD Vance, pritet të takohet me presidentin ukrainas, Volodymyr Zelenskyy, këtë javë.
Në një intervistë për Fox News të transmetuar të hënën, Trump foli mbi konfliktin mes Ukrainës dhe Rusisë, duke theksuar nevojën për një marrëveshje paqeje.
“Ata mund të bëjnë një marrëveshje, mund të mos bëjnë një marrëveshje. Ata mund të jenë rusë një ditë, ose mund të mos jenë rusë një ditë,” u shpreh Trump.
Ai gjithashtu argumentoi se ndihma e SHBA-së për Ukrainën duhet të sjellë një kthim ekonomik për Uashingtonin, duke propozuar një shkëmbim me burimet natyrore të Kievit, përfshirë mineralet e rralla.
“Ne po investojmë miliarda dollarë atje dhe dua të shoh një kthim. I thashë Ukrainës se dua ekuivalentin e kësaj ndihme, si 500 miliardë dollarë në minerale të rralla,” tha ai, duke shtuar se Kievi kishte rënë dakord për këtë parim.
Trump ka emëruar të dërguarin e tij të posaçëm, Keith Kellogg, për të hartuar një plan për ndalimin e luftimeve. Sipas burimeve pranë qeverisë ukrainase, Kellogg pritet të mbërrijë në Ukrainë më 20 shkurt, vetëm disa ditë para trevjetorit të pushtimit rus.
Ndërkohë, Zelenskyy vazhdon të kërkojë garanci të forta sigurie nga Uashingtoni për të parandaluar një rigrupim të forcave ruse. Ai ka theksuar se “paqja e vërtetë dhe garancitë efektive të sigurisë” janë thelbësore për stabilitetin e Ukrainës dhe të gjithë botës së lirë.
“Siguria e popullit tonë, e shtetit tonë dhe e marrëdhënieve ekonomike po vendoset tani,” tha Zelenskyy në një mesazh me video.
Sipas zëdhënësit të Zelenskyy-t, Sergiy Nikiforov, presidenti ukrainas do të takohet me JD Vance të premten, në margjinat e Konferencës së Sigurisë në Mynih. Delegacioni amerikan do të përfshijë edhe Sekretarin e Shtetit, Marco Rubio, si dhe Keith Kellogg.
Nuk pritet të ketë përfaqësues të qeverisë ruse në këtë samit, konfirmoi Christoph Heusgen, kryetari i konferencës.
Trump ka deklaruar se dëshiron të ndërmjetësojë përfundimin e luftës, por ende nuk ka prezantuar një plan konkret. Nga ana tjetër, Rusia ka kërkuar që Ukraina të tërhiqet nga rajonet jugore dhe lindore, ndërsa Zelenskyy ka refuzuar çdo lëshim territorial ndaj Moskës.
Neë York Post raportoi se Trump kishte zhvilluar një telefonatë me presidentin rus Vladimir Putin për të diskutuar mundësinë e një armëpushimi. Sipas raportimeve, Putin kishte shprehur dëshirën e për ndalimin e luftës, por Kremlini nuk e ka konfirmuar apo mohuar këtë lajm.
