Vazhdon procesi gjyqësor ndaj ish-krerëve të UÇK-së

Procesi i gjykimit ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi do të vazhdojë edhe të martën në Dhomat e Specializuara të Kosovës në Hagë. 

Sipas DHSK-së, seanca nis nga ora 09:00, teksa parashihet të vazhdojë deri pasdite, në ora 16:30.

Të hënën ka filluar dëshminë Sylejman Selimi i cili mban kodin 04290 në procesin gjyqësor ndaj ish-krerëve të UÇK-së.

Atij i është dhënë garanci që nuk do të ndiqet penalisht për dëshminë e tij.

“Keni garancitë që parashikohen. Do të thotë që nuk do te ndiqeni penalisht. Në qoftë se do të jepni dëshmi, këtë dëshmi do ta keni rastin siç e kemi tani që dëshminë do ta jepni në publik në kuptimin që ju mund të ndiqeni përtej gjykate. Megjithatë, ju e keni të drejtën që dëshminë tuaj ta jepni me dyer të mbyllura që do me thënë do të ulën perdet dhe që askush të mos iu dëgjojë”, ka thënë kryegjyqtari.