Merzi zotohet të ndërtojë 50 termocentrale me gaz nëse zgjidhet kancelar i Gjermanisë
Udhëheqësi i opozitës gjermane, Friedrich Merz, i cili mendohet të jetë kancelari i ardhshëm i Gjermanisë, është zotuar të ndërtojë 50 termocentrale me gaz nëse konservatorët e tij fitojnë zgjedhjet e parakohshme të 23 shkurtit, raportoi të dielën gazeta t-online.
“Ne duhet të ndërtojmë 50 termocentrale me gaz në Gjermani sa më shpejt që të jetë e mundur, të cilat do të lidhen menjëherë me rrjetin”, ka thënë Merz, i cili kryeson bllokun konservator CDU/CSU, në një intervistë për t-online.
Prodhimi i energjisë elektrike me gaz në Gjermani është rritur me një rekord prej 79% në nëntor, në krahasim me një muaj më parë, raporton Reuters.
Prodhimi i energjisë së erës ishte 25% nën nivelet e një viti më parë në tetor dhe nëntor 2024 për shkak të shpejtësisë së ngadaltë të erës, duke i privuar firmat e energjisë nga një burim kyç i energjisë elektrike pikërisht në fillim të dimrit. Fermat me erë furnizuan 27% të energjisë elektrike gjermane në vitin 2023.
Merz, kreu i bllokut konservator CDU/CSU të Gjermanisë, mendohet se do ta pasojë kancelarin socialdemokrat Olaf Scholz, koalicioni i përçarë i të cilit me të Gjelbrit dhe Demokratët e Lirë pro-biznesit u shemb në nëntor për shkak të planeve kontradiktore për të ringjallur ekonominë e plogësht të vendit.
Ai ka thënë për t-online se ka qenë një “gabim serioz strategjik” nga qeveria e Scholzit “mbyllja e tri termocentraleve të fundit bërthamore që garantonin prodhim të besueshëm të energjisë në mes të krizës energjetike”./koha
