Periskopi

Çudit Murati me postimin, në fushatë i kujtohet se duhen votat e opozitës për t’i votuar marrëveshjet ndërkombëtare

08 Jan, 15:59

Kur kanë mbetur edhe një muaj nga zgjedhjet e 9 shkurtit, ministri i Financave, Hekuran Murati, është kujtuar që për kalimin e marrëveshjeve ndërkombëtare i janë nevojitur votat e partive opozitare.

Në një shkrim në profilin e tij në ‘facebook’, Murati ka thënë se për t’i kaluar marrëveshjet duhen dhe ndihma e opozitës dhe se Qeveria Kurti po e përmbyll mandatin pa i votuar marrëveshjet ndërkombëtare të mbetura.

Sipas tij, opozita ka vendosur të mos i votojë, duke “i bërë opozitë shtetit, duke menduar që po e dëmton qeverinë”.

“Për kalim të marrëveshjeve ndërkombëtare nevojiten 80 vota, që nënkupton se përveç votave të pozitës, nevojiten edhe votat e opozitës në mënyrë që të mundësohet kalimi i tyre.

Kësaj radhe, megjithëse mandati ishte i plotë, kjo legjislaturë e Kuvendit po e përmbyll mandatin pa i votuar marrëveshjet ndërkombëtare të mbetura”, ka shkruar Murati.

“Njëra ndër marrëveshjet e mbetura pa votuar është edhe ajo me Bankën Botërore në vlerë prej 90 milionë euro, e që e veçanta e saj është kamata 0% për 12 vite, të cilën do ta lakmonte secili shtet i botës.Mirëpo opozita jonë ka vendosur të mos e votojë, e kësisoj t’i bëjë opozitë shtetit duke menduar që po e dëmton qeverinë.Por qytetarët nuk do ta harrojnë këtë sjellje të opozitës dhe do t’a thonë fjalën e tyre më 9 shkurt”, ka deklaruar ai.

Shpërndaje në: