Grubi në kërkim ndërkombëtar, BDI: Propozuam ligj për mos futjen e “non gratave” në zgjedhje, e rrëzuan ata që na akuzojnë sot

BDI e Ali Ahemtit u përgjigjet akuzave në drejtim të saj pasi ish-zv.kryeministri Artan Grubi u shpall në kërkim ndërkombëtar për t’u arrestuar dhe futjes së tij në listën e zezë amerikane.

Në një deklaratë, BDI thotë se ata qe e akuzojnë sot bllokuan një propozim të BDI kur ajo ishte në qeverinë e përkohshme deri në maj të këtij viti, i cili parashikonte ndalimin e individëve për pjesëmarrje në zgjedhje dhe proceset e prokurimit publik.

BDI thotë se disa aktorë politikë po e shfrytëzojnë situatën për përfitime politike të momentit.

Reagimi i plotë

Deklaratat e VMRO-DPMNE-së për “rënie të popullaritetit” të BDI-së nuk janë asgjë tjetër veçse një projeksion i pasigurive të tyre.

Po të ishin të sinqertë së paku  një herë të vetme, do të pranonin tronditjen që përjetuan këto ditë kur panë sondazhet e tyre të brendshme, të cilat qartazi tregojnë se partnerët e tyre të inxhinieruar shqiptarë janë zhdukur nga harta politike.

Ky është realiteti: sa më shumë të shtypni një popull, aq më shumë rritet qëndrueshmëria dhe rezistenca e tij.

Populli shqiptar ka qëndruar gjithmonë i bashkuar përballë provokimeve, dhe çdo përpjekje për të cenuar dinjitetin e tyre vetëm do të forcojë vendosmërinë për të qëndruar krenarë.

I bëjmë thirrje VMRO-DPMNE-së dhe bashkëpunëtorëve të tyre të reflektojnë mbi retorikën dhe veprimet e tyre përçarëse.

Forca e një shoqërie qëndron tek barazia, drejtësia dhe respekti për të gjitha komunitetet—jo tek përpjekjet për të ulur një komunitet për përfitime politike afatshkurtra.

Shqiptarët do të vazhdojnë të ngrihen mbi këto provokime, siç kanë bërë gjithmonë.

BDI mbetet e palëkundur në misionin e saj për të mbrojtur dinjitetin dhe të drejtat e shqiptarëve si dhe të gjithë qytetarëve duke ndërtuar një Maqedoni të Veriut më të fortë dhe më të bashkuar.