Largimi i Feronikelit nga garat, këto skuadra do të penalizohen më së shumti sipas rregullores së FFK-së

FC Feronikeli ’74 njofoti sot edhe zyrtarisht tërheqjen nga garat për edicionin 2024/25, pasi sipas tyre po dëmtohen nga gjyqtarët.

Klubi nga Drenasi nuk do të vazhdojë më garat në futboll, pasi sipas tyre rrethanat nuk ia lejojnë një gjë të tillë.

“Tigrat e Zi” janë ankuar disa herë në gjykimin e ndeshjeve të tyre, ku kanë thënë se i janë humbur shumë pikë dhe tashmë është bërë “mjaftë”.

Feronikeli ’74 e ka ftuar prokurorinë që të hetojë gjyqtarët dhe sjelljet e tyre të njëanshme, të cilat kanë dëmtuar sportin që të gjithë e duam, teksa kanë kërkuar falje të sinqerta për futbollistët, tifozët “Tigrat e Zi”, për donatorët dhe për të gjithë ata që kanë qëndruar përkrah tyre ndër vite.

Por, çfarë ndodh me futbollin e Kosovës e sidomos me ligën elitare, me rastin e largimit të Feronikelit ’74?

Ballkani do ta humbte vendin e parë, derisa Malisheva do të rikthehej në krye.

Drita po ashtu do të shënonte ngritje në tabelë, duke u pozicionuar e dyta.

Ferizaj do të goditej më së shumti nga ky vendim, duke mbetur në vendin e fundit me 8 pikë. Klubit ferizajas do t’i hiqeshin gjashtë pikë, pasi ka dy fitore ndaj Feronikelit ’74.

Kjo për shkak se sipas rregullores së FFK-së, nëse një klub tërhiqet nga garat ende pa zhvilluar 50% të ndeshjeve të sezonit, atëherë çdo pikë e arritur ndaj tyre do të shpallet e pavlefshme.

Tabela e re: