Shkon në 140 numri i të vdekurve nga përmbytjet në Spanjë

Agjencia shtetërore e lajmeve spanjolle EFE ka raportuar se numri i të vdekurve nga përmbytjet tani është rritur në 140.

Bëhet e ditur se shifra e re përfaqëson një rritje të ndjeshme krahasuar me numrin e fundit zyrtar të raportuar këtë mëngjes, prej 95 vdekjesh.

Autoritetet kishin paralajmëruar se numri i njerëzve të vrarë do të rritet – duke thënë se shumë njerëz ishin ende të zhdukur dhe se ata ishin të vetëdijshëm se dhjetëra trupa ende nuk ishin nxjerrë nga veturat e bllokuara, shkruan skynews, përcjell Telegrafi.

Kryeministri spanjoll tha se njerëzit e goditur nga katastrofa duhet të qëndrojnë në shtëpi, me parashikime për më shumë shira të rrëmbyeshëm.

“Agjencia spanjolle e motit ka ngritur ende alarme në Valencia dhe përreth Spanjës. Kështu që unë u bëj thirrje të gjithëve që t’i dëgjojnë ato rekomandime dhe t’u kushtojnë vëmendje këshillave të autoriteteve të zbatimit të ligjit dhe mbrojtjes”, shtoi ai.