Presidentja e Komisionit Evropian (KE), Ursula Von der Leyen, ka shprehur interesim për idenë e “qendrave të kthimit” jashtë Bashkimit Evropian (BE), përfshirë vendet e Ballkanit Perëndimor, për migrantët që kërkojnë azil. Por, kryeministri Kurti ka përjashtuar mundësinë për adoptim të një plani të ngjashëm si të Italisë e Shqipërisë.

“Një pranim i përkohshëm i refugjatëve, nëse e kërkon urgjenca, është sigurisht gjithmonë i mundur”, ka deklaruar kreu i ekzekutivit kosovar, duke e hedhur poshtë idenë e imitimit të modelit italian, ngase, në bazë të këndvështrimit të tij, këto qendra do të “rëndojnë si ndërgjegjen e qytetarëve të Ballkanit ashtu edhe të BE-së”.

Kryeministri Kurti ka përshëndetur angazhimin e Von der Leyenit për integrimin e përshpejtuar të vendeve të Ballkanit Perëndimor në BE. “Të bësh zgjerimin prioritet është përgjigja më e mirë ndaj atyre që kërkojnë të shkatërrojnë sigurinë dhe unitetin e Evropës”, ​​ka theksuar ai, ndërsa është ndaluar edhe në problemet me Serbinë.

“E rëndësishme që bashkëpunimi ndërmjet shteteve të BE-së dhe Serbisë të mos bëhet në kurriz të demokracisë në këtë vend apo të sigurisë në Ballkanin Perëndimor”, ka shtuar ai. “Franca dhe Gjermania t’ia bëjnë të qartë Serbisë se bashkëpunimi ekonomik s’do të thotë licencë për të shkelur të drejtat e njeriut e për të ngacmuar fqinjët”.

Sa i përket situatës në pjesën veriore të Kosovës, kryeministri Kurti ka nënvizuar: “Unë luftoj kundër krimit që rrënon zonat serbe në veri dhe tashmë kemi mbyllur 18 rrugë ilegale”, ka shpjeguar ai. “Nëse dikush ka pritur që kur të bëhem unë kryeministër do të vazhdonin këto mënyra të paligjshme, atëherë ata nuk më kanë njohur vërtet mua”.