Krasniqi: Gjendje alarmante në ushtrinë tonë, Qeveria e do veç për fotografi e propagandë

Kryetari i Partisë Demokratike të Kosovës, Memli Krasniqi ka thënë se letra e gjeneralit Bashkim Jashari drejtuar ministrit të Mbrojtjes, Ejup Maqeonci, tregon gjendjen alarmante në Ushtrinë e Kosovës.

Përmes një shkrimi në rrjetin social Facebook, Krasniqi ka thënë se Qeveria ka abstenuar nga obligimet ndaj ushtarëve, dhe se ushtrinë e do vetëm për fotografi e propagandë.

“Letra e Gjeneralit Bashkim Jashari dërguar Ministrit të Mbrojtjes lidhur me shqetësimet e shumta që kanë të bëjnë me shërbimet ushqimore, mungesën e personelit dhe problemet sanitare, shpërfaqë një gjendje alaramante në ushtrinë tonë e cila kërkon trajtim emergjent nga ana e shtetit.

Fatkeqësisht, ajo që është e thirrur për t’a trajtuar seriozisht këtë çështje, Qeveria, moti ka abstenuar nga obligimet e saj karshi ushtarëve tanë. Kjo Qeveri, për të disatën herë po e dëshmon se ushtrinë e do vetëm për propagandë dhe fotografi – e nuk i intereson aspak mirëqenia dhe shëndeti i vajzave dhe djemve që me përkushtim i shërbejnë ditë dhe natë atdheut.” – ka shkruar ai.

Krasniqi ka thënë se në Kuvend do të kërkohet transparencë dhe llogaridhënie nga Qeveria.

“Partia Demokratike e Kosovës nuk do të qëndrojë duarkryq derisa ushtarët tanë po nëpërkëmbën në këtë mënyrë. Në Kuvend dhe në çdo instancë tjetër, do të kërkojmë transparencë dhe llogaridhënie të plotë nga qeveria.

Për ushtarët tanë, të cilëve përmes keqmenaxhimit qeveritar po u cënohet morali dhe krenaria, kam vetëm një lutje: mos u dëshpëroni! Angazhimi juaj është boshti i shtetit tonë. Jemi bashkë në këtë sfidë!”.