Kusari: Njollë e zezë, turp për RTK`në – KPM gjeti se ajo mashtroi kundër Periskopit dhe Nacionales

Juristja e së drejtës së medias, Flutura Kusari thotë se “propaganda e dobët e VV-së kundër mediave përmes veglës së tij RTK-së, propagandë kjo lehtësisht e zbulueshme, mori dënimet e merituara”.

Kusari i është referuar një vendimi të Komisionit të Pavarur të Mediave, që e ka aprovuar ankesën e Nacionales, që së bashku me Periskopin u përmendën nga Radio Televizioni i Kosovës si media që kontrollohen nga presidenti i Serbisë, Aleksandar Vuçiq.

“Vendimi i KPM-së kundër RTK-së është njollë e zeze në historinë editoriale të transmetuesit publik, njollë për të cilën duhet të turpërohen të gjitha ata që kanë dorë në të, emrat e të cilëve i di publiku. Sot Komisioni i Pavarur për Media ka gjetur që RTK e ka mashtruar opinionin publik duke publikuar informacion të pasaktë dhe të pavërtetë kundër Nacionales Pra, në gjuhë më të thjeshtë – raportimi i RTK-së se Serbia dhe Vucici kanë blerë dhe/apo kontrollojnë mediat Nacionale dhe Periskopi janë të pavërteta, të pasakta dhe mashtrim i publikut”, shkroi Kusari në një postim në Facebook.

Paraprakisht, Kusari thotë se “edhe Këshilli i Mediave të Shkruara të Kosovës kishte gjetur që RTK-ja ka raportuar të pavërteta, ka nxitur urrejtje dhe nuk i ka kontaktuar fare Periksopin dhe Nacionalen ”.

“RTK-ja kontrollohet, udhëhiqet dhe qeveriset në baza ditore nga Lëvizja Vetëvendosje. Më vjen shumë mirë që ne shoqnia civile dhe mediat e kemi dokumentuar kapjen politike të RTK-së dhe kjo po mbështetet me vendime të njëpasnjëshme nga institucionet përgjegjëse”, shkruan ajo.