Qytetarëve po u dërgohen SMS të dyshimta, Posta bën thirrje për kujdes
Posta e Kosovës u ka bërë thirrje qytetarëve që të kenë kujdes që të mos bien pre e një mashtrimi me SMS që po u dërgohen nga palë të panjohura.
Përmes një njoftimi ka udhëzuar që të mos klikohet në asnjë link që mund të dërgohet me SMS. Më tej ka sqaruar se Posta nuk kërkon të dhëna personale apo numër bankar, duke apeluar kështu për kujdes nga mesazhe me kërkesa të tilla që mund t’u dërgohen qytetarëve.
Posta e ka cilësuar këtë si sulm, por nuk ka dhënë të tjera informacione.
“Posta e Kosovës njofton publikun që të mos bjerë pre e një mashtrimi. Palë të panjohura po dërgojnë SMS qytetarëve, duke u paraqitur në emrin e Postës së Kosovës. Menjëherë pasi është njoftuar për këtë, Posta e Kosovës ka informuar organet kompetente dhe po bashkëpunon me to. Të nderuar qytetarë, ju lutëm mos klikoni asnjë link të dërguar përmes këtyre mesazheve dhe të mos bashkëpunoni me numra që nuk janë të Postës së Kosovës. Në asnjë rast, Posta e Kosovës nuk do t’ju kërkojë të dhëna personale apo numër kartele bankare. Edhe posta të tjera në rajon janë sulmuar nga keqbërës të ngjashëm”, thuhet në njoftim.
