Blinken akuzon median ruse RT se është një rrjet i inteligjencës mbarëbotërore të Kremlinit

Sekretari amerikan i Shtetit, Antony Blinken, ka njoftuar sanksione të reja kundër rrjetit televiziv rus që mbështetet nga shteti RT, e njohur si Russia Today, pasi informacionet e reja të mbledhura treguan se ajo ishte “duke funksionuar si një krah de facto i aparatit të inteligjencës ruse”.

Qeveria ruse në vitin 2023 krijoi një njësi të re në RT me “aftësi operacionale kibernetike dhe lidhje me inteligjencën ruse”, pohoi Blinken, me qëllimin e përhapjes së ndikimit rus në vendet në mbarë botën përmes operacioneve të informacionit, ndikimit të fshehtë dhe prokurimit ushtarak, shkruan The Guardian.

“Sot, ne po ekspozojmë se si Rusia vendos taktika të ngjashme në mbarë botën”, tha Blinken. “Armatizimi rus i dezinformatave për të përmbysur dhe polarizuar shoqëritë e lira dhe të hapura shtrihet në çdo pjesë të botës”.

Thesari i SHBA do të sanksionojë tre entitete dhe dy individë të lidhur me Rossiya Segodnya, kompania shtetërore ruse e medias, tha Blinken. Vendimi erdhi pas njoftimit në fillim të këtij muaji se RT kishte derdhur gati 10 milionë dollarë për influencuesit konservatorë amerikanë përmes një kompanie lokale për të prodhuar video që synonin të ndikonin në rezultatin e zgjedhjeve presidenciale amerikane në nëntor.

Duke folur me gazetarët nga departamenti i shtetit të premten, Blinken akuzoi RT për financimin e armëve dhe pajisjeve për ushtarët rusë në Ukrainë, duke përfshirë pushkë snajper, forca të blinduara, pajisje për shikim natën, dronë, pajisje radio dhe gjeneratorë me naftë. Disa nga pajisjet, duke përfshirë dronët e rikonstruksionit, mund të merren nga Kina, tha ai.

“Ndërsa fushata ‘croëdfunding’ është e hapur, ajo që fshihet është se ky program administrohet nga drejtuesit e RT-së”, tha Blinken. Ata përfshinin kreun e RT-së, Margarita Simonyan, e cila ishte midis nëntë punonjësve të kompanisë të shënjestruar me ndalimin e vizave në fillim të këtij muaji.

Blinken gjithashtu detajoi se si organizata kishte shënjestruar vendet në Europë, Afrikë dhe Amerikën Veriore dhe Jugore. Në veçanti, ai tha se udhëheqja e RT kishte koordinuar drejtpërdrejt me Kremlinin për të shënjestruar zgjedhjet e tetorit 2024 në Moldavi, një shtet ish-sovjetik në Europë ku Rusia është akuzuar për një luftë hibride për të ushtruar ndikim më të madh. Në veçanti, tha ai, udhëheqja e RT kishte “përpjekur të nxiste trazira në Moldavi, me gjasë me qëllimin specifik për të shkaktuar që protestat të ktheheshin të dhunshme”.

“RT është e vetëdijshme dhe e përgatitur të ndihmojë planet e Rusisë për të nxitur protesta nëse zgjedhjet nuk rezultojnë në një kandidat të preferuar nga Rusia që të fitojë presidencën”, tha Blinken.

Si rezultat i përpjekjeve të RT për dezinformim, tha Blinken, SHBA, Mbretëria e Bashkuar dhe Kanadaja do të nisin një “fushatë të përbashkët diplomatike … për të mbledhur aleatët dhe partnerët në mbarë botën për t’u bashkuar me ne në adresimin e kërcënimit të paraqitur nga RT dhe makineritë e tjera të dezinformimit rus dhe ndikimit të fshehtë”.