Arrestohet një 24 vjeçar në Gjilan, dyshohet për disa vepra penale

Policia e Kosovës në rajonin e Gjilanit ka arrestuar një 24 vjeçar, i dyshuar për disa vepra penale.

“Me datën 26.08.2024 si rezultat i angazhimit të përbashkët të njësitit të hetimeve të stacionit Policor në Gjilan me njësite të tjera relevante policore dhe veprimeve operative – hetimore, është identifikuar, lokalizuar dhe arrestuar i dyshuari F.I. (viti i lindjes 2000, mashkull kosovar).

Arrestimi i tij është bërë pasi që janë gjetur prova se i njëjti dyshohet të jetë i përfshirë në të paktën gjashtë raste ‘’Vjedhje’’, një rasti ‘’Sulm’’ dhe një rast ‘’Posedimi i paautorizuar i narkotikëve, substancave psikotrope ose analoge’’”, thuhet në njoftimin e policisë.

Po ashtu gjatë arrestimit tek i dyshuari pasi që i është bërë kontrolli i tij janë gjetur dhe sekuestruar 1.16 gram substancë narkotike e llojit marihuanë dhe 0.2 gram substancë narkotike e llojit heroinë të cilat do të përdore si prova materiale në gjykatë.

“I njëjti pas është intervistuar në prezencë të avokatit mbrojtës, me urdhër të Prokurorit të Shtetit është dërguar në mbajtje për 48 orë”, thuhet në njoftim.