‘Kjo është një sfidë që dy vitet e fundit që e kanë bizneset’: Kosovarët të papunë, bizneset me punëtorë nga shtetet e jashtme

Kosova pritet t’i ketë rreth 1.6 milionë banorë, sipas regjistrimit regjistrimit të popullsisë që u realizua sivjet.

Por, rreth dy të tretat e saj, apo 1 milion e 180 mijë e 450 persona, janë në moshë pune.

Kështu thotë raporti i Agjencisë së Statistikave të Kosovës, në rezultatet e Anketës së Fuqisë Punëtore për tre mujorin e tretë të vitit 2023.

Sipas raportit në këtë periudhë persona të punësuar ishin 432,040, që nëse krahasohet me periudhën e njëjtë të vitit 2022, janë 14,567 më shumë.

Prej tyre, 332,420 janë burra, kurse 150,839 gra.

Çuditërisht, është rritur edhe numri i personave të papunësuar gjithsej 51,219 apo 529 me shumë.

Të punësuar nga mosha 15 deri 64 vjeç janë rreth 432 mijë veta, kurse të papunë në këtë moshë janë 51 mijë kosovarë.

Kurse ata që i takojnë moshës, 15 deri 24 vjeç e që janë të papunë është afro 11 mijë.

E statistika më shqetësuese vlerësohet ajo e të rinjve që nuk janë të punësuar, dhe që nuk ndjekin as shkollim apo ndonjë trajnim, që përbën një total prej 103 mijë të rinjve.

Kështu e konsideron edhe ekonomisti Bashkim Mustafa, por që problem të njëjtë e sheh edhe një kategori tjetër.

“Çka është shqetësuese në këtë raport është shkalla e lartë e papunësisë,  sidomos te pjesa jo aktive e popullsisë, ku pjesëmarrje më madhe kanë femrat me një  vlerë pre 75.2%”, ka thënë ekonomisti Bashkim Mustafa.

Por, ndryshe e konsiderojnë situatën në vend nga Oda Ekonomike të Kosovës.

Ata janë të shqetësuar me zvogëlimin e fuqisë së re punëtore, shkaku i largimit të tyre nga vendi.

“Po vazhdon sfida e mungesë së fuqisë punëtore. Kjo është një sfidë që dy vitet e fundit që e kanë bizneset, mirëpo është me e theksuar me liberalizimin e vizave. Sektorët me të goditur edhe me së shumti nga mungesa e fuqisë punëtore janë sektorët e ndërtimtarisë dhe gastronomisë”, është shprehur Kryetari i OEK-ut, Lulzim Rafuna.

I njëjti shtoi se punëtorë po vijnë nga shtetet e tjera siç janë Bangladeshi, Nepali, India dhe Turqia.