Krejt çfarë dihet për arrestimin e dy kosovarëve që dyshohet se spiunonin për BIA-n serbe

Një operacion hetimor disamuajsh ka rezultuar dje me arrestimin e dy agjentëve të dyshuar të shërbimit sekret serb në Ferizaj. Agjencia Kosovare e Inteligjencës dhe zyrtarët e saj, të cilët kanë qenë truri i operacionit, kanë arritur pastaj me prova ta bindin Prokurorinë dhe Policinë që të ndërmarrë masa. Por kush janë dy të arrestuarit që dyshohen se punuan për llogari të shërbimit sekret serb, BIA?

Sipas burimeve, bëhet fjalë për Bedri Shabanin dhe Muharrem Qerimin.

Bedri Shabani ka punuar si doganier gjatë viteve të 90-ta, pra gjatë periudhës së Millosheviqit, kurse Muharrem Qerimi ka punuar si zyrtar i Policisë së Kosovës, deri pak pas shpalljes së pavarësisë së Kosovës.

Bashkëpunëtori i hershëm i Shërbimit Sekret Serb (BIA) që nga vitet e ’90-ta, sipas këtyre burimeve kishte si detyrë të mblidhte informata dhe të trillonte me qëllim të njollosjes së imazhit të Kosovës duke ndërtuar narracione të njëjta me Serbinë edhe në kontekstin e ndryshimit të fakteve historike.

Të ndaluarit, sipas burimit, janë përcjellë me vite nga institucionet e sigurisë.

Po ashtu, ky burim bën të ditur se të ndaluarit i kanë raportuar një oficeri të shërbimit sekret serb me emrin Srdjan Rosiq.

Kush është Srdjan Rosiq?

Srdan Rosiq gjatë viteve ’90-ta ka jetuar në Ferizaj derisa ishte i angazhuar si oficer në shërbimin sekret serb. Emri i tij është përmendur edhe në rastin e gjykimit ndaj kryekriminelit serb Slobodan Millosheviq në Tribunalin Ndërkombëtar të krimeve të luftës në Hagë.

Në transkriptin e njërës prej seancave gjyqësore të datës 22 shtator 2005, një dëshmitar i cili ishte polic i SUP-it serb (Sekretariati i Punëve të Brendshme), pyetet nëse e njeh Srdjan Rosiqin. Ai përgjigjet se Srdjan Rosiq në atë kohë ( sq. vitet e ’80-ta dhe ’90-ta) ishte punonjës operativ në Shërbimin shtetëror të sigurisë për rajonin e Ferizaj.

Por, çka kanë bërë ose çfarë kanë tentuar të bëjnë tutje Bedri Shabani e Muharrem Qerimi?

Informacionet tona të mbledhura nga organet e sigurisë së Kosovës thonë se qëllimi ka qenë kontaminimi dhe kriminalizimi i UÇK’së, përmes stisjes së provave ose fabrikimit të dëshmitarëve të ndryshëm.

Bedri Shabani, sipas këtyre informacioneve, ka provuar ta shtrembërojë të vërtetën për Masakrën e Reçakut.

Siç dihet, Serbia provon tash e sa vite që ta shtyjë narracionin e saj se kinse Masakra e Reçakut ka qenë e sajuar nga UÇK dhe bashkësia ndërkombëtare, se njerëzit e vrarë aty nuk janë vrarë nga policia dhe ushtria serbe por nga UÇK.

Me këtë narracion, ata tentojnë pastaj ta delegjitimojnë vet ndërhyrjen e NATO’s në Kosovë. Sipas informative tona, për t’i ndihmuar Serbisë në këtë narracion ka provuar edhe vet Bedri Shabani.

Sigurisht, kjo i mbetet prokurorisë dhe gjykatave që ta provojnë. Meqë aktualisht, Shabani është thjesht i dyshuar.

Po ashtu, ka informacione se Bedri Shabani ka provuar ta shpikë edhe një “Shtëpi të Verdhë” si ajo në veriun e Shqipërisë, por kësaj radhe në Kosovë.

Informatat e mbledhura në rrugë operative, janë se ai ka provuar që shtëpi të verdhë ta shndërrojë ish-spitalin e UÇK ‘së në fshatin Mollopolc, afër Reçakut.

Si Shabani, ashtu edhe Qerimi, ka dëshmi se kontaktet me eprorin e tyre të BIA’s i kanë mbajtur edhe fizikisht, por edhe përmes kontakteve tjera.

Ende nuk dihet kur saktësisht ata ranë në gjurmë nga AKI, por dyshohet se kohën e fundi ata kishin provuar ta inskenojnë një incident etnik në Kosovë: diçka që në Kosovë janë parë shpesh. Sipas gjitha gjasave, këtu ata janë zbuluar. Sido që të jetë, kjo tash është punë për prokurorinë.

Në këtë rast është interesant mënyra si kanë funksionuar të dyshuarit si agjentë të Serbisë. Bedri Shabani shumicën e kohës ka jetuar jashtë Kosovës, kurse Muharrem Qerimi, pas largimit nga policia, kishte provuar të paraqitet në publik si njeri i rëndësishëm, ose si njeri që punon për AKI’në ose ndonjë shërbim sekret të vendit. Ndërkohë, kishte vazhduar që të merret me patundshmëri.

Sipas informacioneve, prokuroria tashmë ka prova bindëse, materiale inkriminuese për ta dhe dokumentacione pafund që dëshmojnë se ata po përpiqeshin ta dëmtonin shtetin e Kosovës.

Ditëve të ardhshme, do të sjellim edhe dëshmi dhe prova të këtij rasti, e njëri prej tyre lidhen më një plan ogurzi, që ata kishin ndaj Ëilliam Ëalker, ambasadorit amerikan që i tregoi botës për Masakrën e Reçakut.

Reagon Dogana e Kosovës

Dogana e Kosovës ka konfirmuar se njëri nga të arrestuarit për spiunazh sot në Ferizaj, me inicialet B.Sh, ka punuar në këtë institucion më herët, por se është pushuar nga pozita e tij para 20 vjetësh dhe se prej atëherë s’ka pasur asnjë lidhje me Doganën.

Sipas Doganës, shkarkimi i tij kishte ardhur për shkak të shkeljeve të Kodit të Mirësjelljes së Doganës së Kosovës, lidhur me komunikimet e paautorizuara me mjetet e informimit masiv.

“Që nga shkarkimi i tij, personi në fjalë nuk ka pasur asnjë lidhje me Doganën e Kosovës”, thuhet në njoftim.

“Dogana e Kosovës përgëzon autoritetet e Kosovës për zbatimin e ligjit për përpjekjet e tyre në adresimin e çështjeve që kanë të bëjnë me sigurinë. Ne punojmë ngushtë me të gjitha institucionet e sigurisë për të mbështetur sigurinë kombëtare, në përputhje me misionin tonë. Dogana e Kosovës mbetet e përkushtuar në respektimin e standardeve më të larta të integritetit dhe transparencës në radhët tona”, thuhet tutje.

BIA serbe mohon bashkëpunimin me të dyshuarit

Lidhur me dy arrestimet është deklaruar BIA në një komunikatë për media duke mohuar “çdo marrëdhënie bashkëpunimi me Agjenicinë”.

“Agjencia për Siguri dhe Informim( BIA) mohon me vendosmëri të gjitha përpjekjet për përhapjen e lajmeve të rreme nga institucionet e përkohshme shqiptare në Kosovë e Metohi, se dy persona me iniciale B.SH dhe M.Q., dhe të cilët u arrestuan sot në Ferizaj për akuzën e kryerjes së veprës penale të spiunazhit kanë qenë në çfarëdo marrëdhënie bashkëpunimi me Agjencinë”, thuhet në reagimin e BIA-s.

Gazeta Express ka sjellë detaje për arrestimin e Bedri Shabanit dhe Muharrem Qerimit, këto detaje mund t’i lexoni duke klikuar në këtë LINK.

Por, çka nënkupton spiunazhi dhe si rregullohet ai në Kodin Penal?

Në Kodin Penal të Republikës së Kosovës, vepra penale e spiunazhit hyn në kuadër të veprave penale kundër rendit kushtetues dhe sigurisë së Republikës së Kosovës.

Ai renditet në nenin 124 të këtij Kodi dhe nënkupton disa situata ku ndër to është; kur sekreti shtetëror i komunikohet, dorëzohet, apo i bëhet i arritshëm shtetit të huaj, organizatës së huaj apo personit që u shërben atyre.

Sipas kësaj, dënueshmëria minimale është 5 vjet burg, kurse maksimale është 12 vjet.

Ky nen në paragrafët e tij parasheh edhe situata të tjera dhe dënueshmëri të ndryshme:

– Kushdo që për shtetin apo organizatën e huaj krijon shërbimin informativ në Republikën e Kosovës apo drejton shërbimin e tillë, dënohet me jo më pak se 10 vjet burgim;

– Kushdo që hyn në shërbimin informativ të huaj, mbledh të dhëna për të apo në ndonjë mënyrë tjetër e ndihmon punën e shërbimit të tillë, dënohet me jo më pak se 5 vjet burgim;

– Kushdo që mbledh të dhëna apo dokumente të klasifikuara me qëllim që t’ia komunikojë dhe dorëzojë shtetit të huaj, organizatës së huaj apo personit që u shërben atyre, dënohet me burgim prej 3 deri në 10 vjet.

Nëse këto vepra penale kryhen dhe shkaktojnë pasoja të rënda për sigurinë ose fuqinë ekonomike apo ushtarake të shtetit, kryesi dënohet me burgim jo më pak se 10 vjet.

Kurse, nëse këto vepra penale kryhen gjatë kohës së luftës, rrezikut të pashmangshëm për luftë, konfliktit të armatosur apo zbulimi i sekretit shtetëror ka të bëjë me sigurinë e Republikës së Kosovës, kryesi dënohet me jo më pak se 10 vjet burgim ose me burgim të përjetshëm.

Sekreti shtetëror, sipas Kodit Penal, për qëllime të këtij kapitulli që trajton këto vepra, nënkupton të dhënat apo dokumentet ushtarake, ekonomike apo zyrtare të cilat janë shpallur si informata të klasifikuara me ligj apo me dispozita ose vendime tjera të organit kompetent të nxjerra në pajtim me ligjin.

Kosova e ka Ligjin për klasifikimin e informacioneve dhe verifikimin e sigurisë qëllim i të cilit është “themelimi i një sistemi unik për klasifikimin dhe ruajtjen e informacioneve që kanë të bëjnë me interesat e sigurisë së Kosovës si dhe për verifikimin e sigurisë së personave që kanë qasje në këto informacione”.