Stano thotë se ende s`ka përfunduar raporti i BE-së për heqjen eventuale të masave ndaj Kosovës

Raporti i Përfaqësuesit të Lartë të BE-së për Politikë të Jashtme, Josep Borrell në lidhje me heqjen eventuale të masave të vendosura nga BE për Kosovën ende nuk ka përfunduar.Këtë e ka bërë të ditur zëdhënësi i BE-së, Peter Stano në një konferencë për media.

Sipas Stanos, raporti ende nuk ka përfunduar, dhe rrjedhimisht nuk është dërguar as shteteve anëtare.

Gjithashtu, Stano ka theksuar se në të do të përfshihen edhe zhvillimet e fundit, përfshirë këtu mbylljen e pikave ilegale të bankave serbe në vend dhe aksionin e Policisë së Kosovës për konfiskimin e dinarëve.

“Masat janë vendosur si përgjigje e hapave të pakoordinuar e të njëanshëm që dërgojnë drejtë eskalimit të mëtejmë, dhe nuk ndihmojnë në deeskalim. Ato ishin vendosur me qëllimin që të motivojnë autoritetet kosovare që të punojnë drejt deeskalimit, kështu që sigurisht gjithçka që po ndodh në terren dhe ka ndikim negativ në përpjekjet për deeskalim, po merret parasyshe dhe përfshihet në raport”, ka thënë Stano.

Tri javë më parë, Stano, kishte deklaruar se raporti i përfaqësuesit të lartë të BE-së për Politikë të Jashtme, Josep Borrell, në lidhje me zbatimin e kërkesave të BE-së para heqjes së masave, ishte në përfundim e sipër dhe pritej që shumë shpejtë tu dorëzohej vendeve anëtare para se eventualisht të merrej një vendim.

Pse nuk e njeh Spanja Kosovën si shtet?