Gjermania e pakënaqur me Kurtin- Çka paralajmëroi emisari gjerman
I Dërguari i Posaçëm i Gjermanisë për Ballkanin Perëndimor, Manuel Sarrazin, ka folur për problemet me të cilat përballen vendet e rajonit, me theks të veçantë për dialogun mes Kosovës dhe Serbisë.
Në një intervistë për ABC, Sarrazin kërkoi më shumë vullnet politik dhe që palët të marrin veprime konkrete, pasi sipas tij, nuk është detyra e Bashkimit Evropian që të jetë arbitër.
Ai më tej foli edhe për raportet e kryeministrit të Kosovës, Albin Kurti, me aleatët ndërkombëtarë, për çka tha se nuk është në interesin e palës kosovare që të humb mundësitë drejt BE-së.
Sipas tij, kjo mund të çojë më shumë në një drejtim të mbështetjes tek vetja dhe humbjes së mundësive për të shkuar drejt Bashkimit Evropian.
Në anën tjetër, Sarrazin kërkoi që Serbia të shkojë në rrugën drejt BE-së dhe që Beogradi zyrtar të vendos sanksione ndaj Rusisë.
“Rruga në të cilën po ecën qeveria e zotit Kurti në dialog, në planin afatgjatë, kam frikë se kjo mund të mos jetë e mirë në interesin e Kosovës, për afrimin me Bashkimin Evropian. Kam frikë se kjo mund të çojë më shumë në një drejtim të mbështetjes tek vetja dhe humbjes së mundësive për të shkuar drejt Bashkimit Evropian”, ka thënë diplomati gjerman.
Sarrazin foli edhe për Samitet e mbajtura në Tiranë, ku bëri thirrje që të mos përdoret e kaluara për të rritur ndjenjat nacionaliste, por vendet e Ballkanit Perëndimor të punojnë së bashku për të shkuar drejt BE-së.
“Mendoj se nuk duhet ta nënvlerësojmë këtë ide të përgjithshme të samitit, i cili u organizua për të treguar se Moldavia, Ukraina dhe vendet e Ballkanit Perëndimor janë bashkë dhe së bashku mund të arrijnë shumë dhe duhet ta shohin njëri-tjetrin pozitivisht, kuptojnë dhe dinë se çdo hap që bën një nga këto vende do të ndihmojë gjithashtu të tjerët. Kjo është shumë pozitive. Dhe gjithashtu kjo, ajo që ndjeva si atmosferë mes liderëve, ishte shumë e rëndësishme. Dhe më pas, Tirana mundi të jepte një mundësi për një takim dypalësh të zotit Zelensky dhe zotit Vuçiç, i cili natyrisht ka disa synime, të cilat ju e dini, ndoshta edhe të dobishme për palën serbe, por gjithsesi, është një fazë e mirë, padyshim”, është shprehur emisari gjerman.
