I jep fund lidhjes 10 vjeçare: Kryeministrja e Italisë nga sot beqare

“Marrëdhënia ime me Andrea Giambrunon, e cila zgjati gati dhjetë vjet, përfundon këtu. E falënderoj për vitet e mrekullueshme që kaluam së bashku, për vështirësitë që kaluam dhe që më dha gjënë më të rëndësishme në jetën time, që është vajza jonë Ginevra”.

Kështu ka shkruar kryeministrja italiane, Giorgia Meloni, në një publikim në median sociale X, njohur më parë si Twitter.

“Rrugët tona kanë disa kohë që kanë ndryshuar dhe ka ardhur koha ta pranojmë”, shtoi kryeministrja në lidhje me marrëdhënien e saj me gazetarin e Mediaset.

Vajza e çiftit, Ginevra, ka lindur më 16 shtator 2016.

Mesazhi, i publikuar edhe në llogaritë e tjera sociale të Melonit, vjen pas videove jashtë transmetimit të emisionit të njohur Striscia la Notizia, të cilat përmbajnë deklarata seksiste dhe seksuale të bëra nga Giambruno në emisionin e tij Diario del giorno, të transmetuar në Rete 4.

Muajt e fundit, që kur liderja e “Vëllezërit e Italisë” u emërua kryeminisre, Giambruno ka qenë protagonist i gafave të tjera dhe shpërthimeve pak a shumë serioze: në shtator ai foli për “transumance” duke iu referuar emigrantëve dhe më pas kërkoi falje pas kritikave.

Për përdhunimet ai kishte thënë: “Nëse shmangni dehjen ose humbjen e vetëdijes, ndoshta ju gjithashtu shmangni përballjen me probleme të caktuara dhe më pas rrezikoni që ujku t’ju gjejë”.

Për ministrin gjerman të shëndetësisë, Karl Lauterbach, duke bërë shaka për ndryshimin e klimës: “Nëse nuk ju pëlqen, qëndroni në shtëpi. Ti je në Pyllin e Zi, je mirë, apo jo?”

Meloni vazhdon në postimin ku bën të ditur ndarjen: “Do të mbroj atë që ishim, do të mbroj miqësinë tonë dhe do të mbroj me çdo kusht një vajzë shtatëvjeçare që do nënën dhe babain e saj , ashtu siç nuk isha në gjendje ta dua atë timen. Nuk kam asgjë tjetër për të thënë për këtë.

Ps. “Të gjithë ata që shpresonin të më dobësonin duke më goditur në shtëpi, duhet ta dinë se sado që pika të shpresojë të gërmojë gurin, guri mbetet gur dhe pika është vetëm ujë”, përmbyll kryeministrja italiane.