Barcelona fiton me zor ndaj Valencias

Barcelona është rikthyer te fitorja në La Liga, pas humbjes së pësuar javën e kaluar ndaj Almerias.

Në ndeshjen e vlefshme për javën e 24-të, skuadra e drejtuar nga Xavi fitoi minimalisht ndaj Valencias.

Ndeshja e zhvilluar në stadiumin “Camp Nou” përfundoi me rezultatin 1:0.

Golin e vetëm dhe të tri pikëve për katalunasit e shënoi Raphinha, në minutën e 15-të.

Barça kishte mundësi të dyfishonte epërsinë në minutën e 55-të, por Ferran Torres dështoi nga pika e penalltisë.

Vendasit luajtën me një futbollist më pak nga minuta e 59-të, pasi Ronald Araujo u ndëshkua direkt me karton të kuq.

Barcelona pas kësaj fitore ka 62 pikë dhe vazhdon kryesimin në tabelë, tani me dhjetë pikë më shumë se Real Madridi, që sonte luan ndaj Real Betisit.

Valencia është e parafundit (19) me 23 pikë.