Ndeshja e Copa del Rey nën hetime, dyshohet për kurdisje
Në Spanjë kanë nisur hetimet për një ndeshje të Copa del Rey, që dyshohet të ketë qenë e kurdisur.
Mediumi spanjoll “Cope” raporton se La Liga është gati që t’i nisë hetimet për një kurdisje të mundshme të ndeshjes mes Levantes dhe Huracanit, e luajtur në fillim të dhjetorit të kaluar.
Gjykata e Melillas e ka nisur hetimin derisa thuhet se një ish-lojtar i Huracanit, skuadër që aktivizohet në ligat më të ulëta të futbollit spanjoll, është arrestuar për rolin e tij në grupin kriminal, i cili synonte të përfitonte në botën e basteve sportive.
Ndër të tjera, thuhet se policia i ka arrestuar gjashtë persona, derisa futbollisti në fjalë ka mbetur në paraburgim.
Kjo ndeshje kishte përfunduar me rezultat të thellë 8:0 në dobi të Levantes.
Ky rezultat thuhet se iu ka leverdis shumë personave, të cilët kanë fituar shumë para nga vënia bast e kësaj loje me gola.
