Pedri: Kemi dështuar keq, do ta fitojmë Evropa Ligën
Pedri nuk e ka mbajtur fshehtë nervozizmin e tij kur foli për eliminimin e Barçës nga Champions League.
Ai e ka kuptuar se nuk u mjafton atyre që të garojnë në këtë turne dhe se nuk ka qenë e lehtë të luajë kundër Bayernit duke e ditur se ata janë eliminuar.
“Ju nuk dilni në lojë me të njëjtin motivim kur e dini se jeni eliminuar. Ne donim t’u jepnim tifozëve një fitore, por nuk mundëm. Ne u detyrohemi tifozëve shumë. Ata kanë qenë gjithmonë me ne. Ne u detyrohemi atyre fitoret dhe titujt. Shpresoj që tani e tutje mund të arrijmë diçka”, tha fillimisht Pedri.
“Ne jemi një ekip shumë i ri me shumë hapësirë për përmirësim. Duhet të përmirësojmë shumë gjëra. Nuk është e mjaftueshme për ne që të konkurrojmë në Champions League. Sot është një zhgënjim”.
“Unë mendoj se nuk duhet të na dëmtojë kalimi në Europa League. Ne duhet të punojmë, e dinim që pothuajse ishim jashtë. Këtë vit ne do të bëjmë gjithçka për të fituar Ligën e Evropës pasi vitin e kaluar nuk mundëm”, përfundoi ai.
