I bënin shantazh, Pogba paguan 100 mijë euro

Futbollisti i Juventusit, Paul Pogba, i ka paguar 100 mijë euro një grupi të organizuar, i cili edhe më parë tentoi t’i zhvaste 13 milionë euro, njoftuan sot zyrtarët francezë.

Prokurorët francezë po hetojnë akuzat që rëndojnë mbi vëllain e Pogba, Mathias dhe miqtë e fëmijërisë. Sipas AP, ata u përpoqën t’i bënin shantazh futbollistit të famshëm të Juventusit.

AP thekson se ky grup ka frikësuar në mënyrë të përsëritur kombëtaren franceze. Një zyrtar i afërt me hetimin, i cili këmbënguli të mbetet anonim, konfirmoi të martën për agjencinë AP se Pogba u tha hetuesve se kishte paguar tashmë 100 mijë euro.

Sipas raportimeve të mediave franceze, Paul Pogba u tha hetuesve se zhvatësit donin ta diskreditonin atë duke transmetuar video mesazhe ku futbollisti i famshëm dyshohet se kishte kërkuar nga një magjistare që të bënte magji për yllin e kombëtares franceze dhe sulmuesin e Paris Saint-Germain, Kylian Mbappe.

AP kujton se Paul Pogba i mohoi këto akuza. Mathias Pogba njoftoi në rrjetet sociale dy ditë më parë se do të zbulojë “shumë gjëra” për vëllain e tij Paul, menaxherin e tij Rafael Pimenta dhe Mbappe.

Mbappe nuk ka dashur të komentojë këtë informacion.