Selmanaj kundër shamisë në shkolla: Kosova, shtet laik

Deputeti i Lidhjes Demokratike të Kosovës, Driton Selmanaj është deklaruar kundër bartjes së shamisë në shkolla.

Ai përmes një postimi në rrjetin social, Facebook, ka theksuar se shteti i Kosovës është laik, duke bërë me dije se shamia në shkolla duhet të ndalohet

Reagimi i plotë:

Kushtetuta e Republikës së Kosovës:

Neni 8 [Shteti Laik]

Republika e Kosovës është shtet laik dhe neutral në çështje të besimeve fetare.

Kushdo që me injorancë apo qëllime tjera perfide cenon këtë normë kushtetuese, atëherë ka cenuar themelet e Demokracisë Kushtetuese të vendit tonë!

Kujtojmë se për temën në fjalë, për herë të parë sot është deklaruar edhe kryeministri Albin Kurti

“Qëndrimin tim, e kam thënë para shumë viteve, e qëndrimi është që nuk duhet të ketë ndalim të shamisë dhe të elementëve të tjera fetare në jetën publike të qytetarëve, duhet të jenë të lirë, por gjithashtu kam thënë se mosha 16-vjeçare është pragu dhe në moshën 16-vjeçare ne e shohim si prag për shumë gjëra të cilat kanë ndodhur por edhe të cilat do të duhej të ndodhin”, deklaroi Kurti.

“Meqë mund të marrësh kartën e identitetit në moshën 16-vjeçare, nëse sistemi e mundëson që me një procedurë edhe të lidhesh kurorë në moshën 16-vjeçare, meqë mosha mesatare është 30-vjeç e 2/3-tat janë nën 35-vjeç besojmë që në të ardhmen e afërt nuk do të ishte keq që edhe mosha e votimit të qytetarëve të ishte 16-vjeç, qysh është në disa vende në botë, përfshirë edhe disa lande në Republikën Federale të Gjermanisë. Ne e shohim moshën 16-vjeçare si moshë e pragut për shumë gjëra e në këtë aspekt edhe për bartjen e shamisë dhe ky nuk është qëndrim i ri, e kemi thënë edhe shumë vite më parë”, u shpreh Kurti./Periskopi