Govori: Agim Ademi më ka kapur për fyti
Artan Govori me të dalë nga Policia ku është intervistuar për rastin e fundit që e pati me kryetarin e FFK-së, Agim Ademin, e që u raportua si përleshje, e ka konfirmuar sulmin në të nga i pari i Federatës.
“Më ka kapur për fyti dhe më ka shtrënguar qafën. Kam edhe një gërvishtje. Pres nga organet të marrin masa”, theksoi Govori.
Gjatë ditës, FFK-ja doli me sqarim në sajtin zyrtar lidhur me këtë çështje, duke thënë se janë të pavërteta.
“Federata e Futbollit e Kosovës sqaron opinionin lidhur me raportimet e mediave për kinse sulm fizik të presidentit Agim Ademi ndaj njërit prej punëtorëve të administratës, Artan Govori brenda selisë së FFK-së. FFK edhe njëherë shpreh indinjatën e saj dhe detyrohet të përgënjeshtrojë raportimet e tilla të pavërteta. Në selinë e FFK-së nuk ka ndodhur kurrfarë sulmi fizik, siç raportohet në media, por thjesht ka qenë një debat i zakonshëm për natyrat e punës brenda federatës. Janë stafi i FFK-së dhe dëshmitarë tjerë, të cilët kanë qenë të pranishëm në momentet kur aludohet se ka pasur sulm fizik, e që në fakt ka qenë vetëm një debat. Raportimet e tilla janë në vazhdën e inskenimeve, presioneve e shantazheve që po bëhen nga persona që nuk kanë aspak të bëjnë me futbollin dhe që synojnë që nëpërmjet formave të tilla të vijnë deri te kapja e këtij institucioni. Sidoqoftë, FFK si institucion kredibil do të vazhdojë rrugëtimin e saj përkundër presioneve të tilla, me qëllimin e vetëm për progres të futbollit kosovar dhe që t’i mbajë larg këtij institucioni dhe larg futbollit njerëzit e grupeve të interesit”, shkruan FFK.
