55 mijë euro për sportistët kosovarë që marrin pjesë në Lojërat Olimpike Dimërore, Pekin 2022
Me qëllim të përgatitjes dhe pjesëmarrjes së sportistëve të Kosovës në Lojërat Olimpike Dimërore ‘Pekin 2022’, Komiteti Olimpik i Kosovës (KOK), do të përkrahet edhe me një vlerë financiare prej 56 mijë e 815 euro nga Ministria e Kulturës, Rinisë dhe Sportit (MKRS).
Për këtë u nënshkrua sot (e enjte) aneks memorandumi i bashkëpunimit mes MKRS-së dhe KOK-ut.
Po ashtu, kjo marrëveshje do të shërbejë për përpilimin e Planit Strategjik të Komitetit Olimpik të Kosovës 2021-24.
Mbështetje financiare për KOK-un është prej kategorisë së subvencioneve dhe vjen si përkrahje për organizimin dhe avancimin e sportit në Kosovë dhe pjesëmarrjen e përfaqësimin sa më të mirë të sportistëve tanë në garat ndërkombëtare.
Marrëveshja është nënshkruar nga Ministri i Kulturës Hajrulla Çeku dhe Kryetari i KOK-ut, Ismet Krasniqi ndërsa në takim ishte e pranishme edhe zëvendës ministrja Daulina Osmani.
